Воведувањето на дохрана носи многу нови прашања и дилеми – од тоа што да се подготви до начинот на чување на храната. Родителите често бараат практични решенија што ќе им го олеснат секојдневието, но кога станува збор за исхраната на бебињата, важно е да се внимава на безбедноста и квалитетот на оброците.
Нутриционистката Мирна Трумбеташ истакнува дека при подготовка на храна за бебиња, најважно е да се внимава на свежината.
„Би препорачала храната за бебиња секогаш да биде свежа, подготвена во текот на истиот ден и чувана во термо-торбичка до моментот на консумирање. Храната лесно се расипува, па бебињата треба да се заштитат од непотребни микроорганизми кои можат да се развијат во неа“, објаснува таа.
Колку долго може да стои храната?
Иако многу родители однапред подготвуваат оброци и ги чуваат во фрижидер, експертката советува внимателност.
„Кога станува збор за свежо подготвена храна, не би препорачала да се чува во фрижидер“, нагласува Трумбеташ.
Најдобро е оброкот да се подготви истиот ден и да се избегне подолго чување, со цел да се намали ризикот од развој на бактерии.
Што е со замрзнувањето?
Замрзнувањето често изгледа како практично решение, но важно е да се прави разлика што е дозволено, а што не.
„Замрзнување на свежо овошје и зеленчук кое подоцна ќе се термички обработи и ќе се вклучи во оброкот – да. Но, замрзнување на готови оброци – не“, објаснува нутриционистката.
Тоа значи дека можете да си ја олесните подготовката така што однапред ќе подготвите и замрзнете намирници, но најдобро е оброците секогаш да се прават свежи.
Иако подготовката на храна за бебе може да биде предизвик, особено во забрзано секојдневие, важно е да се има на ум дека свежината и безбедноста се најважни.
Со малку планирање, можно е да се најде рамнотежа помеѓу практичноста и квалитетната исхрана – а токму тоа е она што му е потребно на секое бебе.
