Децата кои имаат редовни белодробни инфекции се изложени на поголем ризик од слип апнеја во подоцнежниот живот, покажува една студија. Децата чии родители пушат или имале астма, исто така, имаат поголеми шанси за опасната состојба, откриле австралиските истражувачи.
Тие велат дека страдањето од пневмонија или честиот бронхитис пред седумгодишна возраст го зголемува ризикот за повеќе од 20 отсто.
Д-р Чамара Сенаратна, од Универзитетот во Мелбурн, рече: „Најдовме нови асоцијации на мајчинска астма, пушење од страна на родителите и чести инфекции на долниот респираторен тракт пред возраст од 7 години со опструктивната слип апнеја кај возрасни.
„Ова може да биде корисно за да се означи ризикот од опструктивна апнеја при спиење во рамките на клиничката пракса и да се создаде свесност и будност кај ризичните групи“.
Околу 10 милиони Британци страдаат од опструктивна слип апнеја, според „Sleep Apnoea Trust“. Состојбата предизвикува вашето дишење да почне и да престане додека спиете, како и гласно ‘рчење и слаб квалитет на сон.
- Во текот на денот може да ве натера да се чувствувате многу уморни, со главоболки, промени во расположението, како и тешкотии во концентрацијата
Слип апнејата може да доведе до мноштво смртоносни компликации, вклучувајќи висок крвен притисок, мозочен удар, дијабетес тип 2, срцеви заболувања и депресија, според NHS.
Студијата, објавена во „Respirology“, истражува како факторите во раниот живот можат да го зголемат ризикот во зрела возраст.
Истражувачите анкетирале родители на 3.550 деца на возраст од седум години за да видат кои се нивните ризик фактори. Децата биле следени до 53-годишна возраст, кога им биле поставувани прашања за да се види дали имаат или постои веројатност за опструктивна ноќна апнеја.
Децата чии мајки пушеле имале 50 отсто поголем ризик од слип апнеја, покажале резултатите, пренесува британски „Сан“.
