Наставниците влијаат не само на образованието на децата, туку и на нивното воспитување. Со оглед на тоа што во текот на кариерата се среќаваат со многу различни деца и родители, нивните зборови треба да се земат предвид кога станува збор за воспитувањето.
По неколку децении кариера, една пензионирана наставничка открива која е најголемата грешка што ја прават родителите, според нејзино мислење.
„Тие не уживаат во нив“, вели учителката и додава: „Децата се забавни. Мора да уживате во нив“. Родителите, дополнува таа, често сакаат нивните деца да бидат нешто што не се, наместо да уживаат со нив, токму такви какви што се.
Оваа „лекција“ за родителите изгледа многу едноставна, но навистина е многу, многу важна – многу е важно мајките и татковците да ги прифатат своите деца во вистинска смисла на зборот, да ги сакаат поради она што се и да не се обидуваат да ги променат.
Експертите се согласуваат, а родителите …
Со советот на оваа учителка се согласуваат и многу експерти. Нејзина колешка потенцира: „Работам во градинка и многу родители не ги сакаат своите деца. Тие едвај чекаат да ги остават во градинка и да ги земат во последен момент. Тоа ми го крши срцето“.
Друга докторка пак, на социјалните мрежи позната како д-р Карла, истакнува дека како педијатар се согласува со советите на учителката.
Многу родители се согласуваат со ставот на поранешната наставничка, но има и такви кои укажуваат на „другата страна на медалата“.
„Луѓето се буквално во режим на преживување“, сметаат некои родители и велат: „Родителите се под толку голем стрес што не ни сфаќаат колку брзо растат децата“.
Иако е точно дека родителите се зафатени и исцрпени, можеби зборовите на оваа наставничка треба да ни послужат како потсетник на сите нас вистински да уживаме во нашите деца малку повеќе, во хаосот, смеата, предизвиците и сето она што го носи нивното воспитување.
