Поврзете се со бебето, покажете му колку го сакате и животот ќе ви биде полесен и поубав. Ќе имате среќно и мирно бебе, а со самото тоа и помалку стресно секојдневие. Ќе бидете и посигурни во себе, оти ќе знаете да ги задоволувате потребите на бебето.
Ова се посебни начини кои ќе ви помогант да создадете посебна врска со вашето бебе и да му покажате колку сте среќни што е тука:
- Контакт кожа на кожа
Еден од најдобрите начини да се поврзете со бебето е контактот кожа на кожа и тоа неколку пати во денот. Кожата е најчувствителниот дел од телото кај новороденчето и одличен начин за поврзување. Но, додека мајката има многу можности да го оствари ваквиот контакт за време на хранењето, не треба да се заборави ни таткото. Дозволете бебето да се поврзе со двата родитела, така што и таткото ќе го воспостави овој вид на контакт. При контактот со бебето се развива чувство на сигурност. Но, не заборавајте да го покриете грбот на бебето со ќебенце.
- Хранење
Мајките кои дојат веднаш ќе почувствуваат дека времето на доење е одлично за поврзување, но и бебињата кои се хранат со шишенце може да се поврзат со родителите за време на хранењето. Искористете ги овие мирни моменти за поврзување.
- Препознавање на плачот
Потрудете се да ги исполните потребите на бебето и ќе имате совршена врска. Слушајте го бебето кога плаче или кога ви испраќа други сигнали. Тоа е негов начин да ви соопшти што му е потребно.
- Нежна масажа
Масажата на бебето е едноставна вештина која секој родител може да ја совлада. Се што ви треба е малку бебешко масло или лосион и нежен допир. Искористете го времето додека му ја менувате пелената, пред спиење или по капењето, за едноставна и блага масажа. Со благи кружни движења втријте го маслото во кожата и ќе му обезбедите нега и опуштање.
- Не пренесувајте нервоза
Бебето го чувствува она што и вие го чувствувате, и имајте го тоа на ум во текот на денот. Кога сте вознемирени, нервозни ќе ви се чини дека и бебето повеќе плаче. Но, кога се смеете, пеете и сте опуштени и вашето бебе е среќно.
