Светскиот ден на здравјето се одбележува секоја година на 7 април. Овој ден се слави за да се привлече вниманието на одредена здравствена тема која ги засега луѓето ширум светот. Светскиот ден на здравјето го одбележува роденденот на Светската здравствена организација, која е основана во 1948 година. Токму на Светскиот ден на здравјето 2023, СЗО ја одбележува својата 75-годишнина.
Правото на здравје е основно човеково право. Секој човек мора да има пристап до потребните здравствени услуги, во време и место кога ни се потребни, без финансиски тешкотии
Во 1948 година, земјите од светот се обединија и ја основаа СЗО за да го промовираат здравјето, да го чуваат светот безбеден и да се грижат за ранливите, така што секој, секаде да може да постигне највисоко ниво на здравје и благосостојба.
Со децении, СЗО се справува со клучните предизвици на јавното здравје (заразни болести, вакцинација, ризик фактори, климатски промени како закана за здравјето, подобрување на здравјето на мајката и детето, социо-економски детерминанти на здравјето, унапредување на инклузијата…) Напредокот сè уште е загрозен од опстојувањето на здравствени нееднаквости.
Светскиот ден на здравјето се одбележува со цел да се создаде свест за одредена, приоритетна здравствена тема. Во текот на изминатите 50 години беа опфатени бројни теми, како што се менталното здравје, здравјето на мајките и децата, климатските промени итн.
ЗДРАВЈЕ ЗА СИТЕ
Темата за Светскиот ден на здравјето во 2023 година е „Здравје за сите“. Со оваа тема, СЗО создава можност да се погледне наназад на успесите во јавното здравство кои помогнаа да се подобри квалитетот на животот во последните седум децении. Темата, исто така, сака да создаде можност за преземање неопходни активности кои можат да помогнат во справувањето со здравствените предизвици денес и утре.
Терминот „Здравје за сите“ предвидува сите луѓе да имаат добро здравје за исполнет живот во мирен, просперитетен и одржлив свет
Во текот на изминатите седум и пол децении, имаше неверојатен напредок во заштитата на луѓето од болести и уништување, вклучително и искоренување на сипаниците, намалување на инциденцата на детска парализа за 99%, спасување на милиони животи преку детска вакцинација, намалување на смртноста на мајките и подобрување на здравје и благосостојба на милиони луѓе.
„Историјата на СЗО покажува што е можно кога нациите ќе се здружат за заедничка цел“, рече д-р Тедрос Аданом Гебрејесус, генерален директор на СЗО. „Има на што да бидеме горди, но треба да завршиме и доста работи за да ја оствариме нашата основна визија за највисок можен стандард на здравје за сите луѓе. Продолжуваме да се соочуваме со големи нееднаквости во пристапот до здравствени услуги, големи празнини во светската одбрана од итни здравствени ситуации и закани од производи што му штетат на здравјето, како и климатски кризи. Со овие глобални предизвици можеме да се соочиме само со глобална соработка“.
30% од светското население нема пристап до основни здравствени услуги
ПРЕДИЗВИЦИ НА ДЕНЕШНИЦАТА
- Социјалните фактори одредуваат помеѓу 30-55% од здравствените исходи;
- Во најголем ризик од сиромаштија се децата и постарите лица;
- Нееднаквости во здравјето поради изложеност на животни ризици од животната средина;
- 30 % од населението не е во можност да пристапи до основни здравствени услуги;
- Скоро 2 милијарди од светската популација се соочува со огромни трошоци за здравствена заштита;
- Од 2023 до 2030 година се очекува недостиг од 10 милиони здравствени работници.
