Стапката на смртност на доенчиња во САД се зголемила за 3 отсто минатата година – што е најголем пораст во последните две децении, според Центрите за контрола и превенција на болести на САД (ЦДЦ).
Извештајот на ЦДЦ, објавен во средата, бележи поголеми зголемувања за двете водечки причини за смрт на доенчиња – компликации кај мајката и бактериски менингитис.
„Тоа е дефинитивно загрижувачки, имајќи предвид дека оди во спротивна насока од она што беше“, изјави Мари Тома, истражувачка од Универзитетот во Мериленд, која ја проучува смртноста на мајките и доенчињата.
Д-р Ерик Ајхенвалд, неонатолог од Филаделфија, ги нарече новите податоци загрижувачки, но рече дека експертите во овој момент можат само да шпекулираат зошто статистиката која генерално опаѓа со децении наназад се зголемила нагло во 2022 година, пренесува АП.
Инфекциите со РСВ и грип се зголемија минатата есен по две години на пандемиски мерки, полнејќи ги педијатриските итни служби низ целата земја. „Тоа потенцијално може да објасни нешто“, рече Ајхенвалд, кој претседава со комитетот на Американската академија за педијатрија, кој пишува упатства/гајдлајн за медицинска нега на новороденчињата.
Смртноста на доенчињата се мери според тоа колку бебиња умираат пред нивниот прв роденден. Бидејќи бројот на бебиња родени во САД варира од година во година, истражувачите наместо тоа ги пресметуваат стапките за подобро да ја споредат смртноста на доенчињата со текот на времето.
Д-р Ерик Ајхенвалд, неонатолог од Филаделфија, ги нарече новите податоци загрижувачки, но рече дека експертите во овој момент можат само да шпекулираат зошто статистиката која генерално опаѓа со децении наназад се зголемила нагло во 2022 година
Стапката на смртност на доенчиња во САД е полоша отколку во другите земји со високи приходи, што експертите го припишуваат на сиромаштијата, несоодветната пренатална грижа и други можности. Но, и покрај ова, стапката во САД генерално постепено се подобрува поради медицинскиот напредок и напорите во јавното здравство.
Националната стапка се искачи на 5,6 смртни случаи на новороденчиња на 1.000 живородени во 2022 година, во однос на 5,44 на 1.000 претходната година, според новиот извештај.
Зголемувањето можеби изгледа мало, но тоа е првиот статистички значаен скок на стапката по зголемувањето помеѓу 2001 и 2002 година, рече Даниеле Ели, водечки автор на извештајот на ЦДЦ. Таа, исто така, додаде дека истражувачите не можат да утврдат дали порастот во 2022 година е едногодишен статистички тренд – или почеток на долгорочен тренд.
Севкупно во САД, стапката на смртност паднала за 5 проценти во 2022 година – општ пад што се припишува на слабеењето на влијанието на пандемијата КОВИД-19, особено на луѓето од 65 години и постари. Смртноста на мајките во САД исто така опаднала во минатата година.
Повеќе од 30 држави забележаа барем мало зголемување на стапките на смртност на доенчиња во 2022 година, но четири држави имаа статистички значаен пораст – Џорџија, Ајова, Мисури и Тексас.
Во бројки, смртноста на доенчиња во САД надмина 20.500 во 2022 година – 610 повеќе од претходната година на ниво на цела земја. Но, Џорџија имала 116 повеќе смртни случаи на доенчиња од претходната година, а Тексас 251 повеќе.
„Се чини дека некои од државите би можеле да имаат поголемо влијание врз (националната) стапката“, рече Ели, додавајќи дека помалите зголемувања на други места, исто така, имаат ефект – и дека е тешко да се раздвои точно кои се тие места, политики или други фактори кои стојат зад националната статистика.
