Секоја температура измерена до 37 степени Целзиусови (под пазуви) или до 37,5 (мерена во задник) се смета за нормална температура за децата.
Покачена температура е повисока од 37,5 или 38 степени Целзиусови ако се измери во задник. Ако детето е активно и сака да пие течности, таквата покачена температура не треба да се намалува по секоја цена. Температура повисока од 38,5 под пазувите или 39 во задник е многу висока температура и треба да се спушти.
Што да направите ако детето има температура повисока од 38,5 под пазуви?
- Не го затоплувајте и препотувајте детето. Облечете го во лесна облека и покријте го со летна прекривка.
- Дајте му колку што е можно повеќе течности (вода, чај, сокови).
- Почесто нудете го доенчето да цица, ставајте го на града, бидејќи млекото ќе му обезбеди течност и антитела.
- Дозволете му да игра, но погрижете се играта да не е премногу напорна.
- Проветрувајте ја просторијата каде што престојува детето, спречете провев и не излегувајте надвор на студено.
Капење во млака вода
- Расоблеченото дете ставете го во када наполнета со 2-3 прсти вода.
- Температурата на водата треба да биде околу 32-33 степени.
- Навлажнувајте ја кожата со сунѓер или крпа на секои 2-3 минути.
- Ваквото навлажнување на кожата треба да се спроведе најмалку 20 минути.
- Повторувајте ја постапката додека температурата не падне на барем 38 степени (во задник)
Виткање на детето во влажна крпа
- Завиткајте го детето во влажна крпа/пешкир или пелена натопена во вода на собна температура.
- Врз тоа завиткајте сува крпа или чаршаф и држете го детето завиткано 5-10 минути.
- После тоа, избришете го детето со сува крпа
- Повторувајте ја постапката додека температурата не падне на најмалку 38 степени (во задник)
- НЕ ги завиткувајте лицето и главата
- НЕ нанесувајте облоги само на одредени делови од телото (гради, стапала, дланки)
- НЕ ставајте облоги од различни препарати (кромид, компир, цвекло, ракија)
Намалување на температурата со сирупи или супозитории
Кога детето има покачена температура, односно многу висока температура и е малаксало, потребно е да се обиде да се спушти со капење во млака вода или завиткување во влажна крпа и со лекови. Ако температурата надминува 38,5 °C, потребно е да се примени антипиретик. При изборот на лек за намалување на покачена телесна температура, важно е да се знае дека прв избор, според препораката на Светската здравствена организација, е парацетамол.
Во аптеките можете да го најдете во различни форми и дози, прилагодени за употреба кај деца и возрасни. Супозиториите се погодни за најмалите деца. За малку постарите деца кои веќе можат да го земаат лекот преку уста може да се користи сируп, а за постарите има и капсули. Ако постаро дете повраќа или не може да земе лек преку уста, користете супозитории.
Кога задолжително да посетите лекар во случај на покачена температура?
- Детето има температура, а е помладо од 3 месеци
- Има ректална температура повисока од 40 степени
- Има вкочанет врат
- Има осип или крвави подливи
- Има конвулзии
- Има силна главоболка и повраќање
- Чувствително е на допир
- Малаксало е и апатично
- Температурата трае повеќе од 3 дена
- Не користете алкохолни облоги!
Алкохолот многу брзо ја намалува температурата на површината на кожата, ги стеснува крвните садови и го спречува ладењето, па најдобро е да не се применува таква постапка дома. Освен тоа, алкохолот се апсорбира преку кожата и испарува, па детето може да се отруе со алкохол.
