Министерството за здравство ја информира јавноста дека, според најновата прогноза на УХМР, топлотниот бран со температури над 40°C ќе трае до 26 јули 2025 година. Со оглед на ризиците од продолжена изложеност на високи температури врз здравјето на ранливите групи, Владата на предлог на Министерството за здравство усвои дополнителни препораки за периодот 23–26 јули 2025 година:
- Ослободување од работа за бремени жени и лица над 60 години.
- Работа од далечина, флексибилно или двократно работно време каде што е можно.
- Препораките не важат за вработените во критични служби (здравство, полиција, армија, транспорт, енергетика, јавни комунални претпријатија).
Од МЗ потсетуваат и на важечките мерки од Акцискиот план:
- Одложување на работа на отворено од 11:00 до 17:00 часот.
- Обезбедување простории за работа со температура до 25°C каде што е возможно.
- Континуирано информирање на јавноста преку институциите.
- Активирање на протоколи за вонредни услови во сите здравствени установи, домови за стари лица и образовни институции.
ПРЕПОРАКИ ЗА ГРАЃАНИТЕ
- Престојувајте во разладени простории, особено меѓу 11:00 и 17:00 часот.
- Пијте доволно течности, избегнувајте алкохол и засладени пијалаци.
- Носете лесна, светла облека, користете заштита за глава и очи.
- Избегнувајте физички напор во најтоплите часови.
- Внимавајте на децата, старите лица, хронично болните и бремените жени – тие се особено ранливи.
- При симптоми како вртоглавица, гадење, главоболка или забрзан пулс – веднаш побарајте лекарска помош.
- Одложете активности на отворено во критичниот период од денот.
- Осигурете разладени услови во домот и на работното место.
