Дневното излегување на свеж воздух е важно за развојот и зајакнувањето на имунитетот кај бебињата, а ниските температури не значат дека треба да се остане затвореио дома. Сепак, потребна е претпазливост, особено кога станува збор за најмалите. Децата до две години се посклони кон хипотермија и побрзо губат топлина, па затоа за зимска прошетка треба да бидат слоевито облечени во памучна облека и добро покриени, бидејќи лежат и им е постудено.
„Веќе од еден месец бебето може да излегува надвор и во зима, но кај предвремено родените бебиња прошетките е подобро да се одложат кога надвор има минусни температури. Повремено допрете му ги рачињата за да се уверите дека не му е премногу студено. Најдобро време за зимска прошетка е околу пладне, а треба да се избегнуваат магла, мраз или силен ветер. Не се препорачуваат ни вечерни прошетки“, објаснува педијатарката д-р Џованa Армано.
Дневната прошетка, додава таа, не подразбира престој во трговски центри. За првите зимски излегувања со бебе доволни се околу 30 минути, а потоа времето постепено може да се продолжува. Децата постари од две-три години може да бидат надвор и подолго од еден час доколку се физички активни. Кај бебињата во зима често тече носот, што е нормална реакција на студениот воздух.
Бидејќи бебињата често се лигават, потребно е редовно да се брише кожата околу устата за да не се оштети од влажност. По истиот принцип, подобро е бебето да нема цуцла за време на прошетката, бидејќи под неа се собира слина.
„Најниската температура за прошетка зависи од возраста и временските услови. Скандинавците излегуваат и на -15, но ние не сме навикнати на тоа. Не би препорачала најмалите да излегуваат кога е под нулата“, вели д-р Армано.
Една од најчестите грешки што ги прават родителите, продолжува таа, е неадекватното облекување – почесто премногу дебело, отколку премалку. Бебињата секогаш мора да носат капа надвор, бидејќи околу 25% од телесната топлина се губи преку главата, но тоа не значи дека во затворен простор треба да бидат прегреани.
Таквото претерано облекување може да го наруши терморегулацискиот систем, па детето подоцна станува почувствително на студ и посклони на настинки. Поголемите деца кои трчаат и скокаат треба да имаат еден слој помалку облека за да не се препотат, а облеката треба да биде непромоклива.
„Лесно ќе препознаете кога на бебето му е студено. Ќе плаче, рачињата ќе му бидат ледени, а може и да се тресе. Ако родителите ги забележат овие знаци, треба веднаш да го однесат детето дома, да го затоплат и да му понудат топол напиток. Ако бебето е подолг период изложено на студ, може да стане апатично, да се настине, да биде нервозно и почувствително на вируси и бактерии“, објаснува д-р Армано.
