Повеќето од децата со нетрпение го чекаат крајот на првото полугодие и одењето на распуст, кој значи одмор од училиште, игра и забава. Стручњаците по педагошки науки едногласно укажуваат на важноста на корисното и креативното поминување на времето во текот на распустот.
Распустот е добра, често и единствена прилика детето да се посвети на своето хоби, да ужива во она што навистина сака да го прави, но и да стекне ново знаење, на поопуштен и поздрав начин. И повеќето родители се радуваат на училишниот распуст, бидејќи тогаш може малку да здивнат од секојдневните обврски околу децата и училиштето. Така, овозможувајќи им одмор на сите, распустот најчесто поминува во трчање, игри… но потребо е родителите да не го препуштат детето само на себе и активно да учествуваат во овој краток период. Постојат многу начини со кои тоа ќе го направат, само е важно да се има добра волја, желба и креативност.
Родителите задолжително треба да го осмислат и да го испланираат распустот на детето и на тој начин да допринесат во развојот на неговата личност. Распустот е шанса детето да ужива во она што сака да го први, но на поопуштен и поздрав начин да стекне и ново знаење. Родителите треба да водат сметка за тоа децата да не го запостават читањето.
Иако распустот е време за детска игра и забава, сепак ни во овој период не треба да се запостават работните навики, за враќањето на училиште да биде побезболно. Секој родител кој навистина сака да учествува во образованието и воспитувањето на детето мора да води сметка и за тоа неговото дете и преку распустот да ја одржува навиката за читање. Неопходно е на детето за распуст да му изберете литература која ќе му биде интересна и забавна.
