Зимата и студеното време со ниски температури не се пречка, здраво дете да се изнесе на прошетка. Нема пропишани температури при кои не смее да се излегува надвор. Во Скандинавија и на север, бебињата се изнесуваат и при температура од -5 и -10, под услов да се соодветно облечени и да и на родителите не им е непријатен престојот на отворено. Идеални зимски температури за престој на отворено е околу 0 степени и повеќе.
Многу е важно како ќе го облечете бебето. За ниски температури, бебето морате да го опремите со скафандер, капа, ракавици, шал, дебели чорапи.
Новороденче и бебе до една година
Новороденче до еден месец не треба да иде на прошетка во зима, кога е ладно. Доенче на возраст од еден месец до една година, може да е надвор, добро облечено и кога температурите се во минус. Температурата може да биде и минус 5, ако е сончево, без ветер и доволно пријатно да родителите се прошетаат со бебето. Престојот зависи и од тоа колку на шетачот му е пријатно, на пример, половина до еден час е доволно под услов бебето да е задоволно, а можете повремено да му ги пипнете рачињата или носето, за да видите да не е премногу студено.
Постари деца
Поголеми деца, на пример до три години, може да бидат подолго на студено, оти се претпоставува дека прават одредени активности – санкање, играње на снег, лизгање. Тогаш се движат, а не се само во количка, што значи дека два часа претпладне и по попладневното спиење, додека не се стемни е дозволено детето да престојува надвор.
Децата на возраст од пет и шест години може активно да учествуваат во зимски спортови, што тогаш подразбира и подолг престој со активности.
