Произведувањето на разни звуци, не е ништо невообичаено кај новороденчето, а тоа го вклучува и ‘рчењето. ‘Рчењето во најраната возраст, според експертите, не е загрижувачко, но ако постои хронично ‘рчење кај постаро бебе, може да биде сигнал за посериозен проблем. Консултацијата со педијатар, кој ќе ги испита причините за оваа појава е најдоброто решение кое може да го донесете во интерес на здравјето на детето.
ПРИЧИНИ
Новороденчето често “гласно“ диши, од причина што дишните патишта му се тесни и полни со слуз. ‘Рчењето се јавува кога воздухот минува низ тој секрет, поради што меките ткива на дишните патишта вибрираат. Вообичаено, ‘рчењето се смирува како дишните патишта кај бебето растат, а тоа учи да голта повеќе плунка.
До ‘рчење може да дојде и кога проодноста на бебешките дишни патишта е попречена од вишок секрет во нив. Тоа често е случај за време на настинка, кога зголемената количина на слуз, која се наоѓа во носните шуплии, го прави дишењето многу гласно. Слично се случува и кога бебето има некоја алергија. Одредени деформации во носот, како што е девијација на носната преграда, се вбројуваат во состојби кои може да бидат одговорни за појавата на ‘рчење. Постојат и некои анатомско-морфолошки фактори кои многу поретко се појавуваат.
