Стисната тупаница е само еден од вродените рефлекси кои ќе ги забележите во првите недели од животот на бебето. Значи, сосема е нормално новороденчињата да ги држат рацете во тупаници и ова е едно од неколкуте движења кои ќе имаат влијание врз идните фини моторни вештини на детето.
Овој рефлекс можете да го активирате и со галење на отворената рака на бебето со прст. Неговото рефлексивно затворање на раката е само едно од неволните движења на бебињата.
Стиснати тупаници се невролошки одговор кој се јавува додека нервниот систем на бебето се уште се развива. Цврсто стиснати тупаници заедно со свиткани лакти, раце и нозе се „остаток“ од начинот на живот или положбата што бебето ја имало во вашиот стомак.
Бебињата исто така можат да ги стискаат рачињата во тупаници кога се уморни или имаат грчеви, па затоа внимавајте и на тоа.
Како да му помогнете на бебето да ги опушти тупаниците
Во принцип, не е потребно ништо да се прави за бебето да ги ослободи дланките од тупаници, бидејќи овој вроден рефлекс постепено ќе исчезне околу петтиот-шестиот месец од животот. Ако детето ги стега тупаниците поради стрес или грчеви, обидете се да го смирите со лулање и пеење. И секако, ако бебето е гладно, понудете го да јаде. Штом ќе почне да јаде, ќе видите како рачињата полека му се опуштаат и се отвораат.
Дали некогаш треба да ве загрижуваат стегнатите тупаници?
Вообичаено е родителите понекогаш да се грижат за развојот на своето бебе, особено ако го споредуваат детето со други деца на слична возраст. Но, имајте на ум дека педијатрите ги проверуваат сите рефлекси на бебето секогаш кога ќе отидете на редовна контрола.
Меѓутоа, ако и лекарот забележи дека тупаниците се стегнати подолго отколку што треба, тоа може да укажува на проблеми со нервниот систем. Во ретки случаи, пренагласен рефлекс на фаќање може да укаже на церебрална парализа или хипертонус, односно зголемен мускулен тонус (затегнати мускули).
