Дали знаете зошто бебињата ги стегаат дланките во тупаници? Станува збор за рефлекс кој се манифестира во првите недели по раѓањето, а претставува нормална реакција и е едно од неколкуте движења кои им помагаат на бебињата да ги развијат моторните вештини подоцна.
Кога ќе се роди детето, тоа преку различни движења се прилагодува на нова средина полна со звуци, светлина и допир. Со тоа доаѓаат и мноштво физички реакции, вклучително и стискање тупаници. Кога нежно ќе ја погалите отворената дланка на бебето, новороденчето веднаш ќе направи тупаница како одговор на вашето движење. Ова е природна тенденција и едно од неволните движења што ги прават повеќето бебиња.
Значи, стегнатата тупаница е невролошка појава која покажува дека нервниот систем на бебето се развива. Цврсти тупаници и свиткани лакти, раце и нозе се исто така дел од навиките што останале од времето кога се уште биле во утробата на нивната мајка. Исто така, бебињата ги стегаат тупаниците кога се гладни, но тоа може да биде и знак за грчеви.
Овој рефлекс ќе исчезне кога бебето ќе наполни пет-шест месеци. Ако мислите дека тоа го прави поради стрес или грчеви, обидете се да го смирите со повивање, пеење или гушкање. Можеби ќе се изненадите кога вашето бебе силно ќе ве фати за прстот, а може да предизвикате и слично движење на стапалата, кога тие ќе реагираат на вашиот допир со вртење на прстите.
