Стравот на новите родители во првите денови од животот на бебето е главно предизвикан од губењето на неговата телесна тежина.
Бебето во првите три или четири дена губи на тежина и за тоа постојат оправдани причини.
Сосема е нормално бебето во првите денови од животот да калира, односно да губи на тежина. Веќе по 7-10 ден може да почне да ја враќа тежината, иако тоа знае некогаш да потрае и еден месец.
Токму во тие први денови, детскиот организам се навикнува на новата средина, потрошувачката на калории со движењата и плачењето се зголемува, цревата почнуваат со активна работа, столицата се исфрла, урината исто така, а бебето губи влага, односно течност преку кожата.
Оброците се уште не се обилни и детето колку и да јаде не може да добие на тежина, а се случува да и еден дел од оброкот го исфрли преку “бљуцкање“.
Губењето до 10% од масата при раѓањето не се смета за загрижувачки. Губењето од 5-8% во првите денови се смета за физиолошко.
Доењето секако е идеална храна и содржи се што му е потребно на бебето за нормален раст и развој, без разлика на губењето на тежината во првите денови.
Треба да се обрне внимание и на наследните фактори кои влијаат на конституцијата на детето, положбата при доење, распоредот на оброците и да се советува со лекар дали има причина за загриженост.
