Позната е на сите оваа ситуација: детето моли за нова играчка и ветува дека ќе ја сака засекогаш, па вие попуштате и ја купувате. Детето е воодушевено и заљубено во својата нова играчка, но само неколку дена подоцна, таа играчка е стара вест – а ние остануваме збунети.
Зошто децата го прават тоа и како да се избориме со тоа? Еве што велат стручњаците.
Што е со минливата привлечност на примамливите нови играчки или направи?
Д-р Камил Ајс, лиценциран клинички психолог (и мајка на две деца), го припишува овој брз губиток на интерес на одредени психолошки и физиолошки принципи. „На желбата на детето за играчка може да влијаат недоволно развиената емоционална регулација, слабата контрола на импулсите или притисокот од врсниците“, наведува таа. Таа објаснува дека недоволно развиениот процес на донесување одлуки кај децата и тинејџерите може да биде фактор за досадување со нова играчка, бидејќи им е тешко да го предвидат идниот исход на губење интерес кога нивните емоционални, ирационални мисли ќе надвладеат и ќе решат дека им „треба“ нова играчка.
„Исто така можно е новата играчка, која на почеток изгледала како блескаво чудо, всушност да е играчка која го ограничува или не ја разгорува фантазијата на детето. Играчка што ја ограничува детската креативност може да предизвика губење на интерес без разлика колку детето било возбудено што конечно ќе ја добие најновата и најпопуларната играчка“, вели таа.
Лиценцираниот клинички психолог д-р Ребека Харви, мајка на едно дете, вели дека друг можен фактор за досада е природната граница на вниманието кај децата — генерално, тоа е околу два до три пати повеќе од нивната возраст, па четиригодишно дете би имало околу осум до дванаесет минути фокус одеднаш.
Ајс објаснува дека маркетингот или социјалното влијание исто така може да влијаат на нивната желба за новата блескава играчка. „Децата се силно под влијание на рекламите што ги гледаат на ТВ или интернет. Постои причина зошто рекламите функционираат; тие ги претставуваат играчките и направите како бескрајна забава. Лесно е да се разбере зошто детето ‘МОРA’ да има нова играчка, особено ако сите нивни пријатели ја имаат. Ние, како родители, ја мразиме помислата нашето дете да се чувствува изоставено, па брзото решение е едноставно да му го купиме тој популарен новитет“, вели таа.
Што треба да направи родителот?
Ајс сугерира дека намалувањето на бројот на играчки до кои детето има пристап може да помогне во одржување на интересот. „Колку и да звучи контрадикторно, детскиот интерес расте кога пред себе има помалку играчки. Преголемиот број играчки може да предизвика презаситеност, бидејќи едноставно е премногу за нивниот ум. Како родители, често погрешно го толкуваме нивниот губиток на интерес и можеби ќе купиме уште играчки надевајќи се дека тие ќе го задржат вниманието — но циклусот продолжува“, вели таа.
Ротацијата на играчките за да се „освежи“ интересот исто така може да помогне, бидејќи кај децата важи правилото: далеку од очи — далеку од ум, вели Харви. Обидете се за некое време да ги тргнете одредени играчки, а потоа, кога ќе ги вратите, детето со радост ќе игра со нив затоа што повторно ќе му бидат новитет. А кога повторно ќе им се здосадат, тргнете ги од просторот за игра и извадете други „нови“ играчки кои не ги виделе некое време.
Што треба да земете предвид кога во иднина купувате нова играчка?
Децата обично немаат способност да ги проценат трошоците и придобивките, па им е потребно нашето водство за да одлучат дали новата играчка навистина вреди.
Ајс предупредува против импулсивни купувања под влијание на вашите или детските емоции. „Одлуката за нова играчка може да зависи од многу фактори: емоционалната состојба на детето, способноста на родителот да управува со емоциите на детето, исходот и рамнотежата меѓу купување и некопување (цена на играчката, избувнувања, чувство на вина) и нашето сеќавање — точно или неточно — за претходниот интерес на детето за други ‘нови играчки’. Како родители, купувањето нова играчка често го гледаме како можност за ‘поврзување’ со детето и ги игнорираме очигледните знаци дека новата играчка можеби нема да биде она што очекуваме“, вели таа.
