Некои деца ги гризат ноктите, некои ја чешкаат кожата, а други се нишаат напред-назад. Иако повеќето од овие навики не се причина за загриженост, тие понекогаш укажуваат дека во детската глава се случува нешто повеќе.
Една од поупадливите навики што многу родители ја забележуваат е кога детето ја џвака својата маица. Без разлика дали е тренерка, дуксер или блузичка – често може да се види како дел од ткаенината е во устата, како мало „цуцле“ што го смирува.
За многу мајки ова знае да биде извор на нервоза, особено кога детето ја уништува облеката што треба постојано да се купува одново. Но иако навиката изгледа чудно, најчесто не значи дека нешто сериозно се случува.
Зошто децата ја џвакаат облеката?
Стручњаците објаснуваат дека оралната стимулација е многу важна во детскиот развој. Џвакањето е еден вид саморегулација – начин на кој детето се смирува кога е вознемирено или под стрес. Ова однесување е поврзано со природниот инстинкт што го гледаме кај бебињата кога бараат града – потребата за допир и сигурност. Со текот на времето, градата се заменува со маица или некој друг предмет што е „при рака“.
Џвакањето помага за концентрација
И кај возрасните може да се забележи сличен феномен. Многумина, кога се обидуваат да се сконцентрираат, несвесно ја џвакаат врвката од пенкало или молив. Децата го прават истото – џвакаат нешто што им е најблиску. Помалите деца ја избираат облеката, а постарите најчесто моливи или гумени врвови на пенкали. Тоа им помага да се фокусираат, на пример при пишување тест.
Како да му помогнете на детето да ја остави навиката
Иако џвакањето облека вообичаено е безопасно (освен за самата облека), родителите можат да помогнат ако им пречи ова однесување.
Најдобар начин не е забрана, туку пренасочување. Стручњаците препорачуваат да им се понуди нешто друго за џвакање:
- Ако детето е постаро, може да џвака гума за џвакање – тоа често помага да се намали потребата за џвакање ткаенина.
- За помалите деца постојат безбедни силиконски џвакалки, кои личат на огрлици или приврзоци и се направени специјално за оваа намена.
Иако на прв поглед изгледа како чудна навика, џвакањето облека најчесто е само начин детето да се смири, да се фокусира или да се справи со моментален стрес. Со малку разбирање и соодветна замена, оваа фаза обично поминува самостојно.
