Децата денес живеат во премногу чисти, а некои дури и во речиси стерилни услови, што не е добро за нивното здравје.
Научникот Џек Гилберт, автор на книгата Dirt Is Good: The Advantage of Germs For Your Child’s Developing Immune System, започнал да ги проучува „опасностите“ од бактериите откако го набљудувал својот син како си игра надвор.
„Излегувавме надвор и мојот син обожаваше да си игра во кал, но штом ќе се извалкаше, веднаш вадевме влажни марамчиња или антибактериски гел за раце и се грижевме нечистотијата случајно да не му се доближи до лицето“, раскажува тој.
Додава дека истото важи и за домашните миленици: „Секако дека е во ред да се измијат рацете по игра со куче, но ако кучето го лиже лицето на детето, тоа воопшто не е толку критично како што многумина мислат.“
Која е предноста ако му дозволите на детето малку да се извалка? Пред сè, нагласува Џек, се намалува ризикот од алергии. Иако развојот на технологијата и модерниот начин на живот овозможија подобар животен стандард, истовремено ја ослабнаа и силата на детскиот имун систем.
„Во минатото јадевме многу повеќе ферментирана храна која содржеше бактерии. Им дозволувавме на децата секојдневно да бидат изложени на животни, растенија, кал и земја. Денес поминуваме повеќе време во затворен простор. Ги стерилизираме површините и поради тоа детскиот имунитет стана преосетлив“, објаснува тој.
Тој исто така истакнува дека родителите можат да го подобрат имунитетот на децата ако не трчаат постојано по нив со антибактериски средства и влажни марамчиња. Советува децата да внесуваат доволно лиснат зеленчук и влакна, како и колку што е можно повеќе да се ограничи дневниот внес на шеќер.
Затоа, следниот пат кога вашето дете ќе посака да скокне во кал додека си игра надвор, сетете се дека тоа е сосема во ред – ако не и препорачливо.
