Повеќе од три четвртини од трудниците во текот на бременоста чувствуваат силна желба за одредена храна. Најчесто тоа се слатки, млечни производи или солени закуски. Но, желбите понекогаш можат да бидат навистина необични – како маслинки на чизкејк или овошје во салса-сос. Иако ваквите комбинации звучат бизарно, најчесто се целосно безбедни и не претставуваат ризик за здравјето на трудницата.
Желбата за одредена храна зборува за полот на детето
Во некои постари времиња се верувало дека храната по која копнеат трудниците е добар показател за полот на детето. Се верувало дека ако копнеете по слатки, веројатно носите девојче. Во случај да имате желба за месо или сирења, веројатно станува збор за момче. Секако, не постои научен доказ кој ги поврзува желбите за храна со полот.
Умереното задоволување на желбите за одредена храна е здрав пристап – важно е да се избира поздрава алтернатива и да се контролира количината
Доколку, пак, почувствувате желба да изедете нешто што воопшто не е храна, веднаш посоветувајте се со лекар. Тука првенствено се мисли на креда и глина, кои не само што би биле штетни ако се изедат, туку се и можен знак дека на вашето тело му недостига железо.
Желбата е всушност порака од телото
Иако желбите во бременоста се комбинација од хормонални, психолошки, културни и нутритивни фактори, многумина сметаат дека желбата за храна е порака од вашето тело за тоа што му недостига во моментот. Ако, на пример, ви се јаде солена храна, тоа би можело да биде знак дека на вашето тело му треба повеќе натриум кој го зголемува волуменот на крвта. Ако копнеете по овошје, тоа може да биде знак дека ви треба повеќе витамин Ц.
Ако се јави желба за нешто што не е храна (пика), тоа може да укажува на нутритивен дефицит и бара консултација со лекар
Проблемот понекогаш е што пораката се губи на патот до мозокот, односно можеби ќе копнеете по нешто слатко и наместо да изедете овошје, ќе се најдете како јадете нешто нездраво, а слатко.
Начини за сузбивање на желбата за храна
Постојат начини кои ќе ви помогнат во сузбивањето на желбата за храна во бременоста. За почеток – не го прескокнувајте појадокот. Нека биде здрав и нутритивно богат, бидејќи тоа може да помогне да се спречи желбата која се појавува во текот на денот. Освен тоа, ако желбата сепак се појави, секогаш можете да пробате со поздрава алтернатива во однос на она што навистина ви се јаде. Па така, во случај да ви се јаде сладолед, пробајте да го замените со замрзнат јогурт или бонбоните со замрзнато грозје. Во случај да не можете да му одолеете на соленото, пробајте со оризови крекери за да ја задоволите моменталната желба.
Исто така, дури и ако ѝ угодите на својата желба, не мора таа одредена намирница да ја внесете во огромни количини. Ако ви се јаде чоколадо, не е потребно веднаш да посегнете по најголемото чоколадо што го имате дома. Еден ред подеднакво ќе ја ублажи вашата желба како и целото чоколадо. Нема ништо лошо во препуштањето на желбата сè додека знаете дека во тоа не претерувате.
За крај, знајте дека ако ѝ се препуштите на желбата, не сте лоша личност и тоа не е нешто поради што треба да се чувствувате виновни. Желбата за одредена храна е составен дел од речиси секоја бременост. Нема потреба да ја потиснувате целосно – препуштете ѝ се кога чувствувате дека ви е неопходно, но секогаш со умереност. Така ќе го задоволите телото и ќе останете во рамките на здрави навики.
