Родителите често не можат да разберат зошто нивните деца се упорно тврдоглави, непослушни и бунтовни, мислејќи дека проблемот е во начинот на кој ги воспитуваат. Разбирањето на причините за оспорување на родителскиот авторитет е тешко, но всушност нема причина за загриженост.
Според најново истражување, децата кои се многу тврдоглави и бунтовни, односно помалку ги слушаат возрасните, имаат поголема шанса во иднина да станат успешни луѓе. Истражувањето го следело развојот на 3000 деца на возраст од осум до 12 години, почнувајќи од 1968 година до денес.
Научниците собирале податоци за секое дете, вклучувајќи го коефициентот на интелигенција, социо-економскиот статус, семејната ситуација, дневните активности, оценките во училиште, како и нивните ставови и однесувања. Кога по многу години ги анализирале податоците, дошле до сознание дека тврдоглавите и бунтовните деца се подобро снаоѓале во современиот свет отколку децата кои биле примерни и дисциплинирани.
Истражувањето покажало дека децата кои обично предизвикувале авторитет имаат тенденција да поставуваат прашања за светот околу нив и да размислуваат „надвор од рамките“. Научниците утврдиле дека ова бунтовничко однесување им давало креативна предност при креирање нови идеи или започнување бизнис. Децата кои се сметале себеси за бунтовници, непослушни или тврдоглави во детството, подоцна биле поставувани на важни позиции во различни компании и заработувале повеќе од оние кои имале подобри оценки и биле дисциплинирани.
Според анализата на различни варијабли, успехот на бунтовните деца како возрасни може да се објасни со нивната способност да ги ставаат сопствените интереси на прво место. Пошто не ги почитуваат правилата што им се наметнуваат, тие стануваат експерти во преговори и барање повисока плата, а нивната тврдоглавост секогаш ги поттикнува да ја изберат најповолната опција за себе.
