Ако забележите дека вашето дете има осип, го чеша кожата, има пролив, грчеви, кашлица или потешко дишење – можно е да станува збор за алергиска реакција на одредена храна. Иако ваквите алергии често исчезнуваат со текот на времето, важно е да се препознаат и соодветно да се третираат уште од најрана возраст.
Дали алергиите се наследни?
Ако вие или некој друг член на семејството има алергии, шансите се поголеми и детето да развие алергиска реакција – иако не мора да биде на истата храна.
Што се случува во организмот?
Алергијата е прекумерна реакција на имунолошкиот систем на одредена супстанца – најчесто белковина во храната, наречена алерген. Телото ја препознава таа состојка како „опасна“ и создава антитела (IgE) за да се заштити.
Со текот на времето, организмот ја „памети“ таа храна и при повторен контакт повторно реагира – што доведува до симптоми на алергија. Оваа пречувствителност може да започне уште во бременост или за време на доењето, процес познат како сензибилизација.
Кои намирници најчесто предизвикуваат реакција?
Најчести предизвикувачи кај децата се:
- Јајца
- Кравјо млеко
- Соја
- Кикирики
- Риба и школки
Што можете да направите?
Најефективен пристап е т.н. елиминациска диета – привремено отстранување на сомнителната намирница од исхраната. Но, тоа треба да се направи со стручна поддршка (педијатар или нутриционист), за да се избегнат недостатоци во исхраната.
Важно е детето да продолжи да внесува доволно нутриенти и енергија потребни за правилен раст и развој.
Варена храна може да биде побезбедна
Интересно е што некои деца реагираат само на свежа храна, но не и на истата храна ако е термички обработена.
На пример: дете кое е алергично на свежа јаболка можеби нема да има никаква реакција на колач од јаболка или на јаболков компот. Топлината често го уништува алергенот и ја прави храната побезбедна.
