Покрај тоа што на родителите им е важно да исполнат некои основни потреби на децата – потребата од храна, облека, покрив над глава и слично, мајките и татковците имаат и друга „задача“, а тоа е исполнување на емоционалните потреби на децата.
Еве кои 10 емоционални потреби ги имаат децата.
- Безусловна љубов
Децата треба да знаат и да чувствуваат дека нивните родители ги сакаат безусловно, дури (или токму тогаш) и кога не се однесуваат добро или имаат напад на бес. Во такви ситуации, безусловната љубов е единственото нешто што може да ги смири и има многу подобри резултати отколку да ги карате или критикувате. Со тоа што му давате простор на детето да греши, му помагате да ги развие своите способности, да учи и напредува, а исто така му давате можност да почувствува што е безусловна љубов, која е многу важна за неговиот понатамошен живот.
- Внимание
На децата им треба родителско внимание, но вистинско, неподелено внимание, а не она што им го даваме додека правиме нешто друго. Моментите во кои мајките и татковците посветуваат внимание на децата се многу важни за емоционалното здравје на децата, а студија објавена во Journal of Family Psychology потврдила дека постои врска помеѓу родителското внимание кон децата и тоа колку се децата среќни. Тоа добро влијае и на нивната самодоверба.
- Безбедност
Нема потреба да се објаснува колку е важно децата да се чувствуваат безбедно со мама и тато и да знаат дека нивните родители се секогаш тука за нив, и во добри и во лоши моменти.
Ова им помага на децата да имаат здрави односи со другите, но и да развијат силно чувство на самодоверба.
- Потврда
Колку пати вашето дете кажало „Мамо, види!“, покажувајќи ви нешто што направило и очекувајќи од вас восхитување. Не е доволно да кажете ладно „браво“ во такви моменти, туку искрено да го пофалите детето и да го гледате како зрачи од гордост затоа што го потврдувате неговиот труд и му кажувате дека многу ви значи.
Кога родителот ги потврдува искуствата на детето со зборови или гест, тоа е како инјекција на самопочитувсање. Исто така, на овој начин му покажувате на малиот колку го сакате, а тој за возврат чувствува дека може да разговара со вас за се.
- Поддршка
Можеби не сте многу заинтересирани за фудбалот, но важно е сепак да го поддржувате вашето дете доколку ужива да го тренира овој спорт. Многу е важно мајките и татковците да ги поддржуваат интересите на најмалите, како што покажа студијата објавена во Журналот на Американското психолошко здружение, која покажа дека малечките кои имаат голема поддршка од родителите растат во психолошки и физички поздрави луѓе.
Со исполнување на оваа емоционална потреба на детето, ќе му помогнете и да развие издржливост и самодоверба, кои се вештини кои ќе му бидат потребни во животот.
- Граници
На децата им требаат граници за подобро да се прилагодат на околината. На пример, кога вашето дете ќе посегне по колачиња пред вечера, нежно потсетете го дека слатките се јадат после оброк. Ова, се разбира, понекогаш може да предизвика лутина кај малите деца, но родителите треба да бидат доследни и да ја задржат поставената граница.
Иако тоа не е ни малку лесно, на децата им обезбедува цврста емоционална основа и заштита во свет кој понекогаш е премногу исцрпувачки. Освен тоа, поставувањето граници ги учи децата на трпение, одговорност и самоконтрола.
- Приврзаност
Искажувањето приврзаност е нешто што делува како сонце врз емоционалната благосостојба на детето. Затоа, иако понекогаш не сте расположени за прегратка или имате многу работа, сепак покажете му ја на вашето дете својата наклонетост со прегратка или на некој друг начин. Инаку, студиите покажале дека искажувањето приврзаност влијае на чувството на среќа и емоционалната сигурност на децата.
- Припаѓање
Секој од нас треба да се чувствува како да припаѓа некаде, а децата не се исклучок. Тие исто така треба да се чувствуваат прифатени, како дел од група или заедница. Истражувањата покажале дека чувството на припадност им помага на децата да се соочат со предизвиците со поголема самодоверба и дека се поотворени за нови искуства.
- Почитување
Не сте свесни колку големо влијание може да има врз детето кога му се заблагодарувате што ви помогнало со нешто, на пример. Со тоа што го цените детето, ја правите вистинската работа за неговата емотивна благосостојба, ја подигате неговата самодоверба и мотивација. Кога ќе му покажете на вашето дете дека го цените неговиот труд, дури и за наложување коцки, го учите дека е убаво и важно да се биде благодарен, а кога му се заблагодарувате што ви помогнал во нешто, му ја покажувате магијата на тимската работа и одговорноста.
- Емпатија
Малку работи им се потешки на родителите отколку да се справат со детските тантруми, особено ако таквите „испади“ се случуваат на јавно место, па одеднаш сите гледаат кон мама или тато. Но, клучно е да покажете емпатија во вакви и многу други моменти, да се обидете да ја видите ситуацијата низ очите на вашето дете. Една неодамнешна студија на Универзитетот во Торонто покажала дека децата на кои им се пристапува со емпатија можат подобро да ги регулираат сопствените емоции.
