Есента е период кога има многу вируси, времето е променливо, па и децата почесто се болни. За ова секако придонесуваат колективите, односно враќањето на децата во училишните клупи и градинките, па затоа во есенските месеци здравствените домови обично се полни со деца кои кашлаат, киваат, имаат температура, пролив, повраќаат…
Во оваа смисла, важно е да се зајакне имунитетот, во кој исхраната игра важна улога, но сите знаеме дека кога детето е болно, може да биде сериозен предизвик да го натерате било што да изеде.
Детскиот диететичар д-р Далија Римонс истакнува дека навиките во исхраната на децата значително се менуваат кога се болни, па затоа не треба да очекувате да јадат со задоволство или разновидно како кога се здрави.
„Може да јадат помали порции, да бидат понервозни кога јадат или да бидат попребирливи за храната. Додека се болни, фокусирајте се на храна богата со хранливи материи, погрижете се секој залак да има доволно калории и хранливи материи. Што е најважно, проверете дали вашето дете добива доволно вода“, вели д-р Римонс.
Таа наведува и неколку намирници кои е добро да му се даваат на детето кога е болно. „Тие не се магичен лек, но во комбинација со многу овошје и одмор ќе му ги дадат на детето потребните нутриенти за да се бори со болеста и ќе му дадат добар вкус, да јаде и кога не се чувствува добро“, додава таа.
1. Овесна каша
Овесните снегулки не само што се меки, туку и се богати со протеини. “Измешајте ги со полномасно млеко за да добиете оброк богат со масти и калории. За децата кои имаат стомачни проблеми, изберете инстант варијанти бидејќи тие обично содржат помалку влакна и полесно се варат”.
Римонс предлага да додадете малку банана или јаткасти плодови за зголемување на калориите, а добри додатоци за децата со стомачни проблеми се чиа семето или меленото ленено семе, кои се богати со омега-3 масни киселини и помагаат да се намали воспалението.
2. Грчки јогурт
Повеќето деца сакаат грчки јогурт, а оваа намирница е добра бидејќи содржи пробиотици кои се важни за имунитетот. „Изберете грчки јогурт кој е побогат со протеини и незасладен, за да избегнете непотребен додаден шеќер“, советува диететичарката.
А ако детето јаде нешто слатко, подобра опција е да додадете малку мед во грчкиот јогурт (ако детето е постаро од една година), што ќе додаде не само вкус, туку оваа храна има и антиоксидантни, антимикробни и антибактериски својства. „Исто така, медот е добра опција за смирување на болките во грлото“, додава Римонс.
3. Компири
Уште една храна што ја сакаат повеќето деца. “Кога децата се болни, добро е да им ја дадете нивната омилена храна, која обично вклучува едноставни скробови. Компирите се одличен пример за скроб кој е нежен за ќелудникот и лесно се вари. Од пире од компири до печени компири, не можете да погрешите“, вели диететичарката и советува да избегнуваат давање помфрит на децата кога се болни.
„Тоа не е добар избор бидејќи мрсната храна подолго се задржува во желудникот, што може дополнително да ги влоши стомачните проблеми“, вели таа.
4. Палачинки
Повеќето деца сакаат палачинки, а добрата вест е дека, според Римонс, палачинките не се само вкусни, туку и балансиран оброк. „Палачинките се добра комбинација на протеини од јајца, јаглехидрати од брашно и масти кои се добиваат во процесот на пржење“.
Совет на диететичарите е со нив да се послужат боровинки или малини за да може детето да добие дополнителни антиоксиданти или во смесата да се додаде мелено ленено семе поради омега-3 масните киселини кои делуваат противвоспалително.
