Да се биде родител е голема одговорност и жртва, па во таа улога не им е лесно ниту на мајките, ниту на татковците. Мајката исма своја улога и на свој начин е важна за целокупниот развој на детето, но еднакво е важна и улогата на таткото. Таткото низ односот со детето на него пренесува важни животни лекции, а поврзаноста со таткото делува на развојот на свеста за сопствената вредност и самопочитување на детето. Еве кои се важни лекции детето може да ги научи од таткото.
Делење емоции
Што се однесува до чувствата, детето пред се учи од својот татко како да ги покажува своите емоции и да ги споделува со луѓето кои му се важни. Затоа, таткото треба да го поттикне детето да покажува чувства и отворено да зборува за нив. А тоа најдобро ќе го направи ако сам ги покаже и не е дистанциран од семејството. Ако се работи за негативни чувства, како лутина и фрустрација, таткото е личноста која треба на малото дете во развој да му покаже како да се справи со нив на здрав начин и да ги надмине таквите чувства.
Како да слуша
Отворената комуникација е клучот за квалитетни односи. Комуникацијата не е само кажување порака на друго лице, комуникацијата е пред се внимателно слушање и разбирање што сака да ни каже другиот. Тато со својот пример покажува како внимателно да се слуша, но и како да се зборува внимателно.
Свесност за сопствената вредност
За да може детето да се развие во самосвесна личност, односно да биде свесно дека е вредно и способно да ги постигне своите цели во животот, таткото треба да му го покаже тоа преку своето однесување. Обрнете внимание на она што вашето дете го прави, пофалете го, охрабрете го и поддржете го во неговите планови.
Како да ги постави животните приоритети
Децата најдобро учат со набљудување на нивните родители и нивното однесување кон другите, начинот на кој тие се однесуваат на нивните обврски, начинот на кој живеат и како разговараат со своите сакани и луѓето околу нив. Затоа, бидете свесни, начинот на кој вие го перцепирате светот и се однесувате кон него, влијае на тоа каква личност ќе биде вашето дете еден ден.
