Децата не секогаш ги ценат добрите родители. Тоа мора да се каже, затоа што е вистина. Можеме да бидеме извонредни родители, а тие тоа да не го препознаат – барем не веднаш. Често тоа доаѓа многу години подоцна, можеби кога и самите ќе станат родители. До тогаш, ни останува само да се надеваме и да веруваме дека го правиме најдоброто што можеме.
Семејниот психотерапевт Мелани Мекграт споделува пет навики што ги имаат родителите кои се на вистинскиот пат. Еве ги тие 5 едноставни навики кои ги краси родителите што природно се одлични во својата улога:
- Се забавуваат и играат со децата
Играта е најважната „работа“ на детето. Кај бебињата тоа е ползење, кај малите деца игра со коцки, а подоцна цртање, на пример. Секој родител може да се игра со своето дете, да се движи, да твори. Но, не го правиме тоа сите подеднакво често, ниту подеднакво со ентузијазам.
Истражувањата одамна покажале дека заедничката забава и смеење го подобруваат расположението, нè зајакнуваат и ги активираат деловите од мозокот кои ја поттикнуваат креативноста. А покрај сето тоа – најсреќните детски спомени се токму оние исполнети со смеа, радост и игра.
- Ги признаваат тешките моменти
Добро родителство подразбира и жртва. Свесно или не, сите понекогаш се чувствуваме како да „не ги сакаме“ нашите деца – кога премногу зборуваат, кога сме под постојан притисок…
Кога ќе си признаеме дека ваквите чувства се нормални и дека не се знак на неуспех, сме во можност здраво да ги процесираме, наместо да дозволиме да се претворат во огорченост.
- Знаат дека децата се „уметничко дело во изработка“
Современиот психоаналитичар Томас Линаф вели: “Сите очекуваат детето да биде готов, успешен производ. Ретко кој е свесен дека детето, па дури и родителот или бабата и дедото, се ‘дело во процес’.“
Наместо да гледаме на детето како на личност што треба да победи и да постигнува, треба да му овозможиме да го развие својот единствен потенцијал – без трка и без притисок.
Во ова контекст, границите се клучни – да ги познаваме, да ги поставуваме и да ги почитуваме. Тоа создава чувство на сигурност и намалува анксиозност кај детето. Токму тоа е одлика на доброто родителство.
- Добро се грижат за себе
Можеме да се грижиме за другите само онолку колку што се грижиме за себе. Родителите често се чувствуваат виновни ако земат време за себе, а понекогаш и опкружувањето ги осудува за тоа.
Но, колку повеќе и подобро се грижиме за себе, толку сме поподготвени за сите предизвици што ги носи родителството. Дополнително, ние сме пример на нашите деца како да водат здрав живот. Кога се грижиме за себе, ги намалуваме ризиците од стрес и им покажуваме како изгледа здравата самогрижа.
- Учат од сопствените грешки
Сите грешиме – често. Но грешките се еден од најдобрите начини на учење. Кога ќе згрешиме со детето и ќе научиме како да ја поправиме таа грешка, тоа е за доброто на сите.
Со тоа му испраќаме порака на детето: може да се учи од болката, може да се исправи нешто што тргнало наопаку, и тоа е сосема во ред. Тоа е лековито и многу вредно искуство – и за детето, и за нас.
