“Да бидеме искрени – првите неколку недели и месеци со новороденче може да бидат прилично хаотични. Сите знаеме дека е вистина, но поради некоја причина, многу мајки ја минимизираат таа вистина за да ја истакнат убавината на животот со новороденче”, пишува мајката Бри Најџера за Motherly.
Таа споделила три мисли кои можеби ви поминуваат низ глава ако неодамна сте се породиле за првпат, а кои најсериозно, не се вистинити.
Секако, магично е кога ќе се роди вашето дете. И да, тој мирис на новороденче не може да се спореди со ништо на светот. И да, сите сме среќни што станавме мајки. И така натаму, и така натаму…
Но, за мене, особено затоа што сум мајка која се бореше со Лајмска болест и постпородилна депресија – животот по породувањето беше еден од најмрачните периоди. Со оглед дека излегов од таа темнина, сега знам дека многу работи во кои сериозно верував првите недели и месеци биле невистинити.
Ако и ти моментално се наоѓаш во ваков период, направи си услуга и продолжи да читаш.
- „Никогаш повеќе нема да спијам“.
Би било физички невозможно за секоја мајка никогаш повеќе да не спие или засекогаш да се справува со распоредот на новороденото бебе. Фазата со новороденче е токму тоа – само фаза. Вашето бебе ќе почне да спие во одреден момент. Ќе почнете да спиете во одреден момент. Ќе дојде време кога и двајцата ќе спиете цела ноќ и ќе се будите освежени. Запомнете, нема секогаш да биде вака!
- „Никогаш повеќе нема да патувам или да правам нешто забавно“.
Добро утро, и мајките се луѓе. Да, ќе треба некое време да бидете дома и блиску до дома, но ќе дојде време (побрзо отколку што мислите) кога ќе можете повторно да ги правите сите тие забавни работи. Повторно ќе излезете на вечера, на состанок. Повторно ќе патувате и ќе имате нови авантури. Повторно ќе се чувствувате како старата вие. Сериозно, вашите забавни денови не се завршени.
- „Моето тело е уништено“.
Во моментов вашето тело изгледа како голема вреќа полна со компири, вашето лице е полно со темни кругови и се чувствувате како никогаш повеќе да не можете да седите нормално без пакети со мраз. Погодете што? Ќе можете. Неверојатно е како телото се менува поради нашите бебиња, а уште поневеројатно е како сè се враќа на старото место. Вашето тело можеби нема да изгледа идентично како пред бебето, но со малку труд – ќе изгледа речиси како порано, само бидете трпеливи.
- „Никогаш повеќе нема да бидеме сами“.
Бебињата не го окупираат само нашиот дом, туку и нашите спални. Но, погодете што? Ова е само привремено. Вашето бебе ќе се пресели во својот простор со текот на времето. Ќе почне да спие подолго, преку ноќ и преку ден, а еден ден ќе тргне во градинка и училиште. Не го отфрлајте поминувањето време со вашиот партнер толку лесно.
- „Никогаш повеќе нема да излезам од оваа облека или од дома“.
Кога ќе се породите за прв пат, се чувствувате како секогаш да сте во иста облека, стари партали покриени со дамки од подригнување. Не грижете се, вашите денови на спортски панталони, хеланки и постојано перење алишта се одбројани. Во одреден момент во блиска иднина, повторно ќе почнете да се дотерувате, да се шминкате и да го растурате светот. Ветувам!
