Бремените жени често имаат проблеми со спиењето, а несоницата може да се појави во кој било период од бременоста. Најчесто, идните мајки се жалат дека им е се потешко да најдат соодветна положба за спиење во напредната бременост, но не е невообичаено трудниците да имаат потешкотии со спиењето во првиот триместар.
Ако ги земете предвид сите физички промени низ кои жените поминуваат во текот на бременоста, не е чудно што дури осум од десет жени пријавиле проблеми со спиењето за време на бременоста. Ова се петте најчести причини зошто трудниците не можат да спијат во првиот триместар и како да ги решите, за да можете малку да се одморите.
- Поспаност во текот на денот
Во раната бременост, постои големо зголемување на нивото на хормонот прогестерон, кој помага во регулирањето на репродуктивниот циклус на жената. Поради овој хормон, трудниците се екстремно поспани во текот на денот на почетокот на бременоста, но може да го наруши и ноќниот сон, што ги прави уште поуморни во текот на денот.
Најдете време барем малку да се одморите и да спиете во текот на денот, за да имате енергија за нормално функционирање, а имајте на ум дека во повеќето случаи трудниците имаат многу повеќе енергија во вториот триместар.
- Мачнина
Околу 75 проценти од жените чувствуваат мачнини и гадење во првите недели од бременоста. Иако зборуваме за утринска мачнина, всушност мачнината може да се појави во секое време од денот, а особено навечер може да биде непријатно и да ве спречи да заспиете.
За ублажување на мачнините во текот на ноќта, чувајте некои лесни грицки, како крекери, покрај креветот, а шолја чај од ѓумбир може да ви помогне бидејќи ќе ја ублажи мачнината.
- Глад во текот на ноќта
Кај некои трудници постојаното чувство на глад во првиот триместар, кое се јавува и навечер, ги спречува да спијат доволно. Она што може да помогне е да се храните здраво и разновидно, да јадете неколку мали оброци во текот на денот – на овој начин бебето ќе ги има сите потребни хранливи материи, а вие ќе спречите напади на глад кои се појавуваат.
Исто така, комбинацијата на протеини и сложени јаглехидрати, како што се малку сирење и крекери, јадени непосредно пред спиење ќе ви помогнат да го одржите нивото на шеќер во крвта стабилно и да ве спречи да се разбудите гладни во текот на ноќта.
- Постојана потреба за мокрење
Матката, која расте за бебето да има доволно простор, врши притисок врз мочниот меур, поради што мора да уринирате по „сто пати“ на ден. Ова е честа појава во раната бременост, но и во поодмината, кога матката станува се поголема и врши се поголем притисок врз мочниот меур.
Она што можете да го направите е да го намалите внесот на кофеин, кој не само што може да ви го наруши сонот, туку и да ве натера да уринирате почесто.
- Несоница
Многу трудници се грижат како ќе помине породувањето, дали ќе бидат добри мајки, тешко им е да најдат удобна поза поради болните гради, а ова се само дел од причините за несоница кај идните мајки.
Ако имате проблеми со несоница, обидете се да најдете смирувачка рутина во вечерните часови, на пример, капење, а потоа читање или пробајте некои техники за релаксација кои ќе ве смират и ќе ве подготват за сон.
Првиот триместар од бременоста е исцрпувачки за повеќето жени, но имајте на ум дека овие проблеми и непријатности што ги чувствувате наскоро ќе поминат, па ќе имате повеќе енергија во вториот триместар. Меѓутоа, ако некој од горенаведените симптоми е неподнослив, контактирајте го вашиот лекар за да видите дали има решение.
