Постојат толку многу работи што децата треба да ги научат од своите родители и тоа од оние најбанални до некои навистина важни. Мајките и татковците даваат се од себе за да ги научат своите наследници на различни корисни вештини, а ние ви ги откриваме петте работи што секој родител треба да ги научи кај своето дете, според мислењето на психолозите.
- Да готви
Сосема е нормално децата уште од мали да ги интересира што се крчка во кујната и што има во сите тие полици и работни делови. Подготвувањето на оброци тие го доживуваат како игра, што е одлично затоа што можете да го искористите интересот на детето и да го научите да подготви нешто само – а за почеток, да ви помага.
Готвењето, велат психолозите, помага да се развијат комуникациските вештини и да се изрази љубов. Тоа е чин кој покажува несебичност, а носи и задоволство и ги зајакнува меѓучовечките односи.
Оваа вештина ќе им биде многу корисна на децата кога ќе треба да си подготват храна.
- Да не се срами да покаже емоции
Секој родител го сака своето дете, нема сомнеж за тоа, но важно е да му се покаже љубов на различни начини. Всушност, треба да му покажете дека нема потреба да се срами од своите чувства, какви и да се тие, и дека може слободно да ги изразува.
Внимавајте како се однесувате со другите – ако сте ладни, непријателски настроени и сомничави кон сè и секого околу вас, детето ги апсорбира овие информации и лесно може да стане затворено и повлечено.
- Да ја разбира и цени вредноста на парите
Не дозволувајте вашето дете да ве доживува како банкомат, туку научете го да ја цени и разбира вредноста на парите, да знае дека се заработени.
Психолозите велат дека веќе по тригодишна возраст на децата треба да им се објасни што се пари, од каде доаѓаат во семејството, зошто не можете да ги купите сите играчки во продавница и слично.
Родителите треба да ги научат децата дека парите се заработуваат на чесен начин и да им објаснат како тоа се прави, каква независност дава и како работата што ќе ја работат еден ден ќе им донесе и пари.
- Да биде независно
Независноста не треба да му се прикажува на детето како казна или нешто негативно. Важно е детето понекогаш да си игра само, исто како што е важно да си игра и со пријателите.
Родителите, сметаат психолозите, треба да им објаснат на децата кои се предностите на самостојната игра и како може сами да се забавуваат, а не секогаш да се потпираат на некого. Самостојната игра ја поттикнува креативноста и самосвесноста кај децата, а има и големо влијание во подоцнежниот живот бидејќи ги учи на смиреност и ги штити од еден од нивните најголеми стравови – стравот од осаменост.
- Да не се срами од себе
Кога децата се мали, немаат проблем да се однесуваат сосема природно, ниту пак се грижат што мисли некој за нив или дали треба некого да му угодат. Меѓутоа, работите се менуваат и веќе во пубертетот покажувањето индивидуалност станува голем проблем. Се разбира, многу зависи од карактерот на детето, но секогаш можете да го поддржите да биде тоа што е и да не се откаже од своите соништа.
На овој начин детето ќе ја задржи храброста да прави помалку „популарни“ избори и нема да се плаши од неодобрување од најблиските.
