Ретки се оние родители кои никогаш не искусиле проблеми со успивање на мало дете. Било да станува збор за новороденче или бебе старо една година, за повеќето родители успивањето е исцрпувачко.
Ако сте во таква ситуација, обидете се со некои од овие трикови за успивање на децата:
- Бидете здодевни
Кога е време за спиење, престанете со играње, смеење и забава и покажете му на бебето дека е време за спиење. Стивнете, изгасете светло и посакајте му на бебето добра ноќ. Ако бебето се разбуди среде ноќ, и ако бара да го нахраните, направете го тоа, но без разговор и смеење за да не се разбуди. Вратете го во креветче и во тишина покажете му дека е ноќ, и дека е време за спиење.
- Вклучете правосмукалка
Функционира и фен за коса, вентилатор… Неверојатно, но бебето со звукот од тие уреди со леснотија се успива. Штом бебето заспие, исклучете го уредот за да не се навикне да спие исклучиво со тие звуци.
- Разладете ја собата
Многу родители се плашат мало дете да не настине ако спие во студена соба, па толку ја загреваат што во неа едвај се дише. Температурата на телото додека спиеме паѓа, па не ни е потреба претопла соба за полесно да спиеме. Поради жештината, бебињата се нервозни, се потат и постојано се будат.
- Напуштете ја собата
Учете го детето само да спие од мали нозе. Иако на многу родители на почетокот им е жал да го остават малото бебе во соба да спие само, кога ќе порасне, верувајте ќе бидете благодарни сами на себе.
- Држете до рутината
Кога е време за спиење, секогаш придржувајте се до истата рутина. Ако легнувањето во кревет ви започнува со капење и миење заби, правете го тоа секогаш за детето да знае дека е време за спиење. Доколку пред спиење на детето му читате книга, правете го тоа тивко.
