Кога родителите не ги почитуваат границите, ги игнорираат емоциите или љубовта ја условуваат со постигнувања, децата растат со чувство дека не се доволно добри или дека немаат право на свои потреби. Токму таквите обрасци на однесување кај токсичните родители ги издвојува психотерапевтката Маја Ушиоко.
Критика наместо поддршка
Родители кои ги истакнуваат грешките наместо успесите оставаат длабока трага врз самодовербата на децата.
„Ако вашите родители секогаш ги нагласуваа вашите грешки наместо вашите успеси, многу е веројатно дека сте пораснале со чувство дека никогаш не сте доволно добри“, истакнува психотерапевтката.
Емоционална манипулација
Користењето на вина или страв е чест образец кај токсичните родители. Ушиоко вели:
„Користење вина (‘сè ви дадовме, а вие…’) или страв за да ве натераат на послушност.“
Непочитување на границите
„Ако не ја почитувале вашата приватност, изборот на пријатели, хобија или партнери – веројатно сте пораснале со чувство дека немате право сами да одлучувате за себе и за својот живот“, вели психотерапевтката. Родители кои не ја признаваат приватноста или изборите на децата оставаат чувство на немоќ.
Игнорирање на емоциите
Растењето со родители кои ги потценуваат емоциите на децата создава несигурност и срам.
„Вашите солзи или тага можеби биле пречекувани со реченици како: ‘престани да драматизираш’ или ‘немаш причина да бидеш тажен/тажна’“, истакнува Ушиоко.
Ставање на своите потреби пред вашите
Кога децата прерано ја преземаат улогата на возрасни, губат дел од детството. Психотерапевтката забележува:
„Ако често моравте да бидете ‘возрасниот во куќата’, да се грижите за нивните емоции или проблеми, можно е дека прерано сте го изгубиле детството.“
Условна љубов
Токсичните родители често ја поврзуваат љубовта со постигнувања и послушност. Стручњачката објаснува:
„Љубовта беше поврзана со постигнувања – ве сакаа само кога бевте ‘успешни’ или послушни.“
„Ако се препознавате во овие знаци, важно е да знаете дека не сте сами. Во зрелоста можно е да се научи како да се поставуваат здрави граници, да се негуваат сопствените емоции и да се градат односи во кои ќе се чувствувате безбедно и прифатено“, заклучува психотерапевтката.
