Иако е лето и сте планирале да почнете со одвикнување од пелени, ве потсетуваме дека летото и топлото време воопшто не се пресудни услови за ваква сериозна задача. Ако веќе сте се обиделе и вашето дете едноставно не може да го прифати фактот дека е време да врши нужда во нокшир, има премногу незгоди во текот на денот и ви се чини дека сè е залудно, можеби сепак сте донеле погрешна проценка за неговата подготвеност.
Овие 6 знаци „врескаат“ дека вашето дете не е подготвено да ги извади пелените.
- На вашето дете не му пречат валканите пелени
Ако вашето дете воопшто не е загрижено за полната пелена, ниту пак таа му пречи, очигледно е дека му треба уште некое време за да стане свесно за физиолошката потреба за вршење нужда.
- Ако пелената не е сува најмалку два часа
Ако пелената не може да остане сува повеќе од два часа, тоа значи дека детето сè уште не е во состојба да го контролира вршењето нужда. Тоа едноставно, кога ќе се наполни мочниот меур, автоматски ќе ја испушти урината во пелената бидејќи мозокот и мускулите на мочниот меур не се поврзани. Ако пелената остане сува дури и по попладневната дремка, можете да почнете со одвикнување од пелени.
- Не е заинтересирано за нокшир или тоалет
Ако детето одбива да седне на нокшир или се уште нема мотивација да го користи, веројатно сè уште не е подготвено.
- Не може само да се соблече
Еден од условите за користење на нокшир е и доволно развиена моторика да детето само се соблече и да седне на нокширот. Ако ова му е сè уште предизвик, можеби треба да почекате малку пред да почнете со одвикнувањето.
- Нема да седи на нокшир
Предизвик е да го натерате детето воопшто да седне на нокшир, а ако не може да седи на него барем 3 до 5 минути, макар и облечено, сè уште не е подготвено.
- Има отпор кон нокшир
Ако детето има отпор кон нокшир, плаче, се чувствува вознемирено или се плаши да седне на нокшир или тоалет, дефинитивно не е време за одвикнување од пелени.
