Никој не е поважен во животот на дете на возраст од јасли од неговата мама и тато. Малечките се чувствуваат сигурно знаејќи дека сте тука за нив, а вашето присуство е од исклучителна важност за нивната благосостојба. Ви донесуваме 7 знаци преку кои вашите двегодишни и тригодишни деца ви покажуваат дека ве сакаат.
- Ги имитира вашите изрази на лицето
Изразите на лицето се „заразни“ за малото дете повеќе од кој било вирус што може да го „собере“ во јасли. Затоа детето најчесто се смее кога и вие се смеете или изгледа вознемирено кога сте исплашени. Ова имитирање започнува уште во новороденечкиот период, а значително се зголемува меѓу 9 и 18 месеци. - Ги следи вашите реакции
Како би реагирало вашето двегодишно дете кога би видело слон како подготвува ручек во кујната? Најверојатно прво би ве погледнало вас. Светот може да биде збунувачко и изненадувачко место за малечките, па тие ги „позајмуваат“ вашите реакции за да разберат што се случува — затоа што ве сакаат и имаат доверба во вашето мислење. - Го имитира вашето однесување
Дали вашето дете се обидува да ја отвори вратата со вашите клучеви? Ја поправа косата пред огледало како вас? Се вели дека имитацијата е најискрената форма на ласкање, но кај малите деца таа е најискрен израз на почит и љубов.
- Сака да поминува време со вас
Вашето дете сака да одговори на вашите прашања, да ја види вашата реакција на работите што ги прави, да ви раскаже (на свој начин) за своите идеи. Ова се знаци со кои ви ја покажува својата поврзаност и доверба. - Ве користи како сигурно прибежиште
Во ново опкружување, детето најчесто наизменично истражува и се враќа назад кај вас во прегратка. „Ова е сигурен знак на доверба и поврзаност“, објаснува психологот Линда Акредоло. Вие претставувате безбедно, смирувачко и охрабрувачко место. - Бара заштита од вас
Шетате во парк кога големо куче почнува да трча кон вашето дете. Тоа ги подига рацете кон вас за да го земете и цврсто да го прегрнете. „Таквите и слични ситуации се случуваат затоа што детето ви верува и на тој начин ја покажува својата љубов“, објаснува советничката за родителство Мари Шеди. - Бара утеха од вас
Вашето дете може да ви ја подаде раката за да ја бакнете неговата раничка или да заплаче за да го прегрнете откако ќе се сопне во паркот. „Детето знае дека може да смета на вас и на вашата утеха“, додава психологот Акредоло.
