Воспитувањето на децата воопшто не е лесно, но многу нешта од детството имаат големо влијание врз тоа какво ќе биде детето кога ќе порасне. За нивно добро, одредени типови однесување не смеат да се толерираат. Иако понекогаш е тешко – важно е да не попуштате.
- Ривалство меѓу браќа и сестри
Овој тип однесување смирувајте го така што на сите деца ќе им посветувате еднакво внимание. Ако едното дете добие нешто, важно е и другото да добие. Објаснете им дека ги сакате подеднакво и санкционирајте го детето кое упорно му подметнува или му наштетува на другото. Научете ги да ги почитуваат туѓите работи и приватноста. - Склоност кон кражба
Нема потреба од долги објаснувања – децата знаат дека тоа е лоша навика. Често, со вакво однесување тие се обидуваат да привлечат внимание. Учете ги да ги споделуваат своите работи и да не бидат себични. Посветувајте им повеќе внимание, играјте се со нив и разговарајте отворено, без наметнување сопствено мислење. - Невоспитано однесување кон другите
Ова однесување не смее да се толерира, бидејќи води до сериозни проблеми подоцна во животот. Особено е важно однесувањето кон родителите. Објаснете му на детето дека не треба да се однесува кон другите на начин на кој не би сакало тие да се однесуваат кон него. Дете кое не ги почитува родителите и околината тешко може да израсне во добар човек. - Лажење
Понекогаш децата лажат поради страв од реакцијата на родителите. На пример, ако скршат нешто, немојте да реагирате со бес – тоа може да му се случи на секого. Реагирајте смирено и разумно и детето нема да има потреба да лаже. Објаснете му дека лагата не носи ништо добро и дека вистината секогаш излегува на виделина. Подобро е да се каже вистината веднаш, отколку подоцна постојано да се живее во страв.
- Нетрпеливост и викање
Ако детето сака во истиот момент да прекинете разговор со некого и да му се посветите, немојте да го направите тоа – особено ако при тоа вика и се однесува бурно. Смирено објаснете му дека моментално разговарате и дека подоцна ќе си играте. Детето мора да научи да биде трпеливо и да ги почитува другите. - Себично однесување
Ако имате многу обврски, замолете ги децата да ви помогнат. Така ќе научат дека не е добро да мислат само на себе, туку и да им го олеснат животот на оние што ги сакаат. Дополнително, кога заедно ќе завршите некоја работа, ќе имате повеќе време за заедничка игра и дружење. - Се прават дека не гледаат
Важно е уште од мали нозе да научат дека треба да реагираат во одредени ситуации, а не да се однесуваат како тоа да не ги засега. На пример, ако на училиште видат дека некого го малтретираат, треба да му кажат на наставникот. Исто така, ако некој е сиромашен, не треба да му се потсмеваат, туку да помогнат колку што можат.
