Сите добро знаеме како е да се има главоболка, и веројатно ќе се согласите дека чувството не е нималку пријатно. Затоа, ако детето се пожали на исто, ќе се обидеме се за да ја смириме болката. Но, како наједноставно да му помогнете?
За да не посегате по сируп или апчиња против болки, може да се обидете со овие неколку природни лекови:
- Затемнета соба
Понекогаш одморот во затемнета просторија или спиењето еден час преку ден е се што му треба на детето за да се ослободи од главоболката.
- Ладна облога
Додека лежи во затемнета просторија, на некои деца ќе им годи студена облога на вратот, челото или преку очите. Понекогаш ладното може да делува многу релаксирачки.
- Топла облога
Ако ладното не е она што на вашето дете моментално му одговара, обидете се со топла облога. Помагаат и топла бања или туш.
- Масло од нане
Мирисот на маслото од нане на многумина им помага да се ослободат од главоболката. Маслото може да го ставите во дифузер, а ако детето е поголемо, може да му го измасирате делот околу веѓите. Исто така, малку масло може да втриете и по челото или на вратот.
Магнезиум
Магнезиумот е одлична превенција против главоболка, ако вашето дете често страда од неа. Многу магнезиум има во кељот, грашокот, јогуртот, спанаќот и блитвата.
- Вода
Според некои истражувања, една од најчестите причини за детската главоболка е дехидрацијата. Затоа, пред да посегнете по некои лекови, понудете му на детето чаша вода.
- Лаванда
Уште едно есенцијално масло кое може да помогне во смирување на главболката. Одлично е и за ублажување на напнатоста и вознемиреноста што кај детето може да се јават поради болката.
