Во секојдневниот живот, и родителите грешат. Понекогаш губат трпение, креваат тон или носат одлуки за кои подоцна се каат. Родителството е една од најнапорните, но и најодговорните улоги. За да си ја олесните барем малку секојдневната борба, ви пренесуваме листа на работи на кои не треба да го присилувате вашето дете, дури и кога имате најдобра намера.
1. Да јаде ако вели дека не е гладно
Иако лекарите препорачуваат три главни оброци и неколку помали во текот на денот, важно е да се запомни дека секое дете е различно. Телото природно сигнализира кога му е потребна храна. Ретко ќе сретнете дете кое е навистина гладно, а тоа да не го покаже. Затоа, наместо присила, научете го детето да ги слуша сигналите на сопственото тело.
2. Да биде нешто што не е
Ако вашето дете е срамежливо, прифатете ја таа особина наместо да се обидувате да ја „искорените“. Не го терајте да се дружи со многу деца ако му одговара еден близок пријател. Истото важи и за поекстровертните, гласни деца – секое дете има свој темперамент и ритам.
3. Да се извини ако не знае што згрешило
Често може да се слушне како родителите на игралиште бараат од детето да се извини, без притоа да му објаснат зошто. Детето ќе каже „извини“, но без вистинско разбирање. Наместо тоа, прво објаснете што било погрешно и зошто е важно извинувањето.
4. Да му мавне или да разговара со секој што ќе му се насмевне
Правилото „не зборувај со странци“ постои со причина. Учтивоста е важна, но безбедноста е поважна. Детето не треба да се чувствува обврзано да комуницира со непознати лица.
5. Да спие во одвоен кревет или соба ако не е подготвено
Ова е тема за која родителите често имаат поделени мислења. Сепак, многу експерти се согласуваат дека децата не треба да се присилуваат на чекори за кои емоционално не се подготвени. Оставете го детето само да покаже кога е подготвено да спие во свој кревет или соба.
6. Да прави нешто во што очигледно не се снаоѓа
Не станува збор за поттикнување откажување, туку за препознавање на реалноста. Ако по подолг период детето не напредува и не ужива во некоја активност, можеби е време да се обиде со нешто друго. Успехот во области каде што детето има талент значително ја зголемува неговата самодоверба.
7. Да спие кај некој друг ако не сака
Некои деца едноставно не се чувствуваат пријатно да преноќуваат кај пријатели или роднини. Им значи познатата соба, мирисот на домот и утринскиот појадок со мама. Ако детето јасно кажува дека не сака, почитувајте го тоа – чувството на сигурност секогаш треба да биде на прво место.
