За време на сезоната на вируси, родителите често размислуваат како да го зајакнат имунитетот на своите деца и да избегнат често разболување. Педијатарот д-р Гузел Ракимова објаснува сè за имуниот систем на децата, како и начините на кои може да се зајакне.
Како што објаснува таа, веднаш по раѓањето, имунитетот на бебињата значително се разликува од оној на возрасните. Тоа е сè уште незрело и главно се состои од антитела кои се пренесуваат од мајка на дете, а потоа, кога ќе се роди бебето, неговиот имун систем полека почнува да се запознава со вирусите и бактериите. Неговиот одбранбен механизам штотуку почнува да се развива, поради што бебињата се најподложни на инфекции во првата година од животот.
Формирање на имунитет
Имунитетот може да биде вроден или стекнат, објаснува д-р Ракимова.
Вродениот или природен имунитет е првата линија на одбрана која се формира додека бебето се уште е во утробата, но не нуди константна заштита од инфекции.
Стекнатиот имунитет се формира во текот на животот, преку контакт со бројни бактерии и вируси, како и преку вакцинација. Телото ги помни патогените, па следниот пат кога ќе дојде во контакт со нив, реагира многу побрзо и поефикасно.
Пред раѓањето, детето добива одредени заштитни антитела од мајката преку плацентата, а потоа преку млекото по раѓањето. Неговиот имун систем почнува активно да се развива по раѓањето и целосно се формира околу адолесценцијата.
8 чекори за градење силен имунолошки систем
За да ја намалите зачестеноста на разболување и за да организмот на детето да може подобро да се избори против инфекциите, д-р Ракимова предлага да следите осум едноставни чекори:
- Здрава исхрана – важна е урамнотежена исхрана која вклучува задолжително консумирање на овошје и зеленчук.
- Доење – добро е бебето да цица, ако е можно, бидејќи мајчиното млеко содржи антитела кои го штитат детето од инфекции, како и корисни пребиотици кои ја одржуваат здравата цревна флора, која е важна компонента на имунолошкиот систем. Децата кои се доени помалку страдаат од респираторни и цревни инфекции, па мајчиното млеко е важна основа во градењето на имунитетот на децата во првите месеци од животот.
- Прошетки и ‘челичење’ – престојот во простории кои не се премногу топли (околу 20, 21 степен), честото проветрување на просторот и одењето бос ја зголемуваат отпорноста на настинки.
- Доволно сон – малите деца треба да спијат најмалку 10-12 часа дневно, а школските најмалку осум до девет часа.
- Редовна физичка активност – секојдневната физичка активност придонесува за целокупното здравје и имунитет.
- Одржување на хигиена – научете го вашето дете редовно да ги мие рацете и да одржува лична хигиена за да избегне инфекции.
- Вакцинација – важно е да го следите задолжителниот календар за вакцинација за да го заштитите вашето дете од бројни болести и нивните компликации.
- Намалување на стресот – потрудете се вашето дете да порасне во мирна и пријатна средина, избегнувајте прекумерна изложеност на стрес бидејќи тоа негативно влијае на имунитетот.
