Мајчинството е напорна работа без работно време. Кога ќе погледнете околу себе, ви се чини дека некои жени ја работат оваа работа со изненадувачка леснотија, додека други трошат малку повеќе енергија обидувајќи се да ги пофатат сите конци. Но, вистината е дека секоја мајка има свои падови, без разлика колку е организирана, колку се добри нејзините деца и каков систем на поддршка има.
Ова се емотивните предизвици со кои ќе се соочи секоја мајка порано или подоцна:
Не можете секогаш да бидете присутни
Кога бебето е мало, мама е тука да ја исполни секоја нејзина потреба. Болка, глад, страв…секогаш сте тука. Но, како што бебето расте и станува дете, тоа развива сопствени интереси и си создава свои пријатели. Ќе дојде време кога наместо да поминува време со својата мајка, ќе избира да го поминува времето со некој друг, а тој или сличен момент ќе ја растажи секоја мама.
Едноставно мора да го прифатите фактот дека како што расте вашето дете, нема секогаш да бидете присутни во сите делови од неговиот живот.
Некои работи морате да ги пуштите
Тешко е, но некои работи природно минуваат од нашите животи. Доење, носење во носилка, заедничко спиење. И секогаш е тешко кога нешто е последно. Носи тага и сеќавања за тоа колку било убаво и пријатно.
Но, треба да знаете дека доаѓаат нови моменти преку кои ќе можете да развиете блискост со вашето дете.
Да го видите вашето дете повредено
Сигурно сите се сеќаваат на првата вакцинација на своето дете. Неговиот плач, мешавина од болка, очај и неверување. Некои мајки велат дека речиси и самите плачеле. Тој момент може да биде потрауматичен за мајката отколку за самото дете.
Еден ден ќе дојде и до голема повреда. Исечено колено, крв, пад од велосипед… а кога вашето дете ќе истрча до вас плачејќи за утеха, секоја мајка посакува да има супер моќ што може да ја намали болката.
Губите контролата над својот живот
Вашето дете е центарот на вашиот свет, но понекогаш ви недостасува да направите нешто непланирано, како одење во кино после работа или прошетка во сабота наутро. Меѓутоа, вашето време сега е целосно посветено на некој друг и тоа може да создаде прилично голем притисок.
Многу мајки се жалат дека се чувствуваат исклучени, осамени или го губат животот што некогаш го имале, а тоа може да предизвика вистински емотивен ролеркостер.
Борба со тантруми
Кога детето доживува тантрум, тоа не е ниту пријатно ниту лесно затоа што сакате да откриете што толку го вознемирило или исфрлило од такт. Треба да останете смирени и да пружите утеха и уверување, без оглед на тоа што можеби и самите сте веќе на раб со нервите.
Нема мајка која не била исцрпена до последниот здив од тантрумите и нивното смирување и да не и го одзеле секој последен атом сила.
Не сте сигурни во она што го правите
Има денови кога посакувате вашето бебе да може да зборува и едноставно да ви каже што не е во ред. Зошто плаче? Дали е тоа глад? Болка? Нешто друго? И додека размислувате за решенија и дали сте направиле се што сте можеле, црвот на сомнежот се вовлекува во вас. Заедно со тежок ден, тој вид на притисок емоционално би го исцедил некого.
Се обидувате да бидете совршена мајка
Сте сакале да бидете совршени, но не постои прирачник за воспитување, а сите луѓе, вклучувајќи ги и најсовршените мајки, имаат недостатоци. Можеби премногу пати сте го кренале гласот, можеби некогаш сте ветиле нешто, а не испаднало баш како што сте замислиле.
Колку и да се трудите, секогаш ќе се најдете во ситуација да не знаете што да правите и што е добро за вашето дете.
Постојано сте загрижени
Дали моето дете јаде доволно? Дали спие доволно? Дали почна да седи на време? Мајките сепак најчесто се грижат, тоа е во описот на нивната работа. Првиот ден од градинка, училиште, факултет, грижата никогаш не исчезнува.
Не е лесно да ја издржите оваа игра на нерви цел живот, но тоа е нешто со кое секоја мајка мора да се помири.
