Со пролетта, многумина посегнуваат по хартиените марамчиња поради сезонските алергии, а експерт открива и некои многу неочекувани симптоми на сезонските алергии.
Тревата и поленот за многумина се вистинска мака во пролетта. Оние кои имаат сезонски алергии знаат дека затнат нос, кивање, црвенило и чешање на очите се симптомите кои најчесто се јавуваат по контакт со алергени.
„Меѓутоа, сезонските алергии може да предизвикаат и појава на некои чудни симптоми кои многу пациенти не ги поврзуваат со алергија“, вели алергологот д-р Дујен Нгуен.
Непријатен здив
Поленот во воздухот може да биде и причина за непријатен здив.
„Кога премногу секрет се слева низ грлото, пациентите може да почувствуваат мачнина, па дури и да повраќаат“, вели д-р Нгуен. Тој истакнува дека ова може да биде добра средина за развој на бактерии во устата, кои потоа доведуваат до лош здив.
Вртоглавица
Постојаната акумулација на секрет во Евстахиевата туба, која ги поврзува устата и внатрешното уво, може да создаде притисок во ушите. Ова потенцијално може да доведе до хронична болка во ушите и чувство на вртоглавица.
Губење на сетилото за мирис
Во последниве години, губењето на сетилото за мирис најмногу се поврзува со Ковид-19, но всушност и алергиите можат да го предизвикаат овој симптом. Алергологот д-р Нгуен објаснува дека тоа се случува кога мукозните мембрани во носот се многу иритирани или блокирани.
Исцрпеност
Ако се чувствувате повеќе уморни од вообичаено и не можете да се одморите навечер, тоа може да се должи на алергија.
„Покрај фактот што симптомите на алергија влијаат на квалитетот на сонот, тие можат да ги влошат проблемите како што е апнеја при спиење и со тоа да влијаат и на квалитетот на спиење“, вели имунологот д-р Џули Вент.
Освен тоа, алергологот д-р Роберт Ечес додава дека секојдневната борба на организмот против алергиите го исцрпува телото, а тоа доведува и до чувство на замор.
Болка во грлото
Додека болката во грло е многу чест симптом на вирусни инфекции, како што се настинка или грип, исто така може да биде знак дека телото се бори со сезонска алергија.
„Поради зголеменото производство на секрет кој се слева во грлото, што е главниот двигател на болки во грлото“, вели имунологот д-р Вент и додава дека болката во грло може да се појави и поради прекумерна употреба на антихистаминици, кои доведуваат до суво грло.
‘Рчење
Затнатиот нос е еден од симптомите на сезонските алергии, кои ги ограничуваат дишните патишта и предизвикуваат ‘рчење, објаснува д-р Вент.
Необјасниви главоболки
Зголемениот притисок на синусите поради затнатост на носот, може да биде причина поради која се јавуваат необјасниви главоболки. Главоболките поврзани со синусите најчесто се манифестираат со болки во челото и слепоочниците, а најчесто се најсилни наутро, поради акумулираниот притисок од легнување во текот на ноќта. Како што одминува денот, овие главоболки се намалуваат.
Осип
Сезонските алергии може да се манифестираат и на кожата, преку состојби како егзема поради зголемено воспаление во телото.
„Некои луѓе може да доживеат чешање или осип на кожата во директен контакт со алергенот. Ова често може да се види кога децата си играат на трева и ќе развијат осип со чешање откако ќе поминат време надвор“, вели имунологот д-р Џули Вент.
Чешање на јазикот
Устата или јазикот може да чешаат кога се во контакт со одредена храна, но тоа не мора да значи дека се работи за алергија на храна. Д-р Ејчес вели дека тоа е вкрстена реакција на друг алерген, па како пример ги наведува бананите и ајдучката трева.
Ова е познато како синдром на орална алергија и се јавува кога лице со сезонски алергиски ринитис јаде овошје, зеленчук, зачин или јаткасто овошје и се јавува вкрстена реакција. Ова обично може да се избегне со готвење храна.
„Општо земено, симптомите на алергија, без разлика дали се вообичаени или не, може да се третираат со избегнување на алергени, лекови кои вклучуваат орални антихистаминици, назални стероидни спрејови и деконгестиви“, заклучува алергологот д-р Нгуен.
