Природно е дека, како и секој родител, вие го сакате само најдоброто за вашето дете. Меѓутоа, понекогаш преголемите очекувања од детето може да доведе до тоа мама и тато да бидат премногу строги и постојано да го исправаат однесувањето на детето.
Некои родители успеваат да постигнат одредена рамнотежа во сè, додека други и не ни забележуваат дека стануваат премногу строги и авторитарни.
Чести заблуди за строгото родителство
Една од најчестите заблуди е дека строгиот или авторитарен стил на родителство е најефикасниот начин да се промени несаканото однесување кај детето. Во истражување спроведено во 2022 година, дури 36 отсто од родителите рекле дека го сметаат својот стил на родителство построг од повеќето.
„Да бидам искрен, тоа е многу ефикасно, но краткорочно“, вели педијатарот д-р Дилан Очал. Тој истакнува дека родителите кои често користат авторитарни стратегии добиваат контрола на краток рок, но ја жртвуваат емоционалната поврзаност на долг рок.
Децата, често исплашени од строгото однесување на нивните родители или од страв од последици, брзо се прилагодуваат и го менуваат своето однесување, поради што мајките и татковците веруваат дека строгоста е ефикасен начин за воспитување на децата.
Знаци дека сте премногу строги со вашето дете
Во продолжение прочитајте девет знаци кои покажуваат дека можеби сте премногу строги со вашето дете:
- Постојано му се обраќате со груб тон.
- Сте забележале дека често викате или користите закани кога вашето дете се однесува лошо.
- Детето се повлекува од активностите во кои некогаш уживало.
- Загрижени сте дека ако не поставите цврсти правила, вашето дете ќе има емоционални испади или нема да го почитува вашиот авторитет.
- Никогаш не ја земате предвид перспективата на детето.
- Имате многу правила, речиси за се во домот, од оброци до капење.
- Постојано укажувате на грешките што ги прави вашето дете.
- Вие покажувате љубов и наклонетост само кога вашето дете се однесува добро.
- Детето покажува физички знаци на стрес, како што се чести главоболки, стомачни или промени во апетитот.
Психолошкото влијание на строгоста врз децата
Истражувањата покажале дека децата чии родители се премногу контролирачки се изложени на поголем ризик да имаат послаби вештини за саморегулација во адолесценцијата.
„Најдоброто нешто за децата е родителите да ги научат на ефективни стратегии кои ќе им помогнат да научат како да донесуваат одлуки“, вели невропсихологот д-р Ерика Калкут.
„Наспроти тоа, децата чии родители се премногу строги и го контролираат нивното однесување со правила немаат можност да научат зошто и како сами да донесат добри одлуки“, објаснува д-р Калкут.
Како што, се разбира, не е добро да им дозволите на децата да прават буквално што сакаат и да не им поставувате граници, така и претераната строгост има свои последици. На пример, децата на авторитарни родители може да имаат пониска самодоверба и да бидат поанксиозни. Тие исто така може да нормализираат некои агресивни однесувања и да станат поагресивни кон своите врсници.
Што е најважно, честопати им недостасуваат вештините што им се потребни за да се саморегулираат и да направат здрав избор, бидејќи во детството се потпирале на строги родителски правила за да го регулираат своето однесување.
