Родителите сакаат нивните деца да имаат доверба во нив, сакаат тие да бидат првата личност на која детето ќе и се обрати кога ќе му се случи нешто убаво, но и кога станува збор за помалку убави,а важни работи. Тие сакаат нивните наследници да се чувствуваат доволно безбедно за да прашаат што сакаат и да ги споделат своите емоции, а тоа бара однос полн со доверба.
Не е доволно само да му кажете на детето „мене секогаш можеш да се обратиш“, туку е потребно тоа навистина и да го почувствува. Дајте пример, бидете искрени и отворени, советува детскиот терапевт и лиценциран клинички советник Келси Мора, која работела со повеќе од 1.000 деца, и открива кои шест чекори може во тоа да ви помогнат.
- Нормализирајте го разговорот за чувствата
Во својата работа, Мора ги поддржува семејствата низ некои од најтешките разговори – вклучувајќи болести, хоспитализации, траума и смрт. Таа научила дека овие моменти се многу полесни кога детето е изложено на отворена комуникација на дневна основа, а не само кога се случуваат тешки животни моменти.
Кога децата ги гледаат возрасните како ги именуваат и споделуваат своите чувства, тие учат дека е во ред да го сторат истото. Ова им дава тивка, непишана дозвола да се отворат. Тоа може да звучи како: „Малку сум загрижена дека ќе задоцниме на училиште и на работа. Ајде да работиме заедно“.
Станува збор за давање пример – кога ги именуваме емоциите гласно, и добрите и непријатните, ги учиме децата дека чувствата не се нешто што треба да се крие, вели Мора.
- Не избегнувајте тешки работи
Кога децата гледаат како возрасните избегнуваат одредени теми, тие брзо учат што е „надвор од границите“ и можат уште повеќе да се грижат за нив. Ова може да вклучува ситуации каде што родителите избегнуваат да зборуваат зошто некој користи инвалидска количка или нешто слично.
Кога го избегнуваме непријатното или непознатото, ги учиме децата дека таквите теми не треба да се дискутираат. Наместо тоа, обидете се да создадете простор каде што сите прашања се добредојдени, љубопитноста се среќава со смиреност, а искреноста е дел од секојдневниот живот.
- Бидете искрени за вашите предизвици
За многу родители, емоционалната отвореност не доаѓа природно. Можеби не сте пораснале во дом каде што чувствата биле слободно покажувани или споделувани, и тоа е во ред, но тоа не значи дека не можете да му понудите на вашето дете нешто различно.
Можете исто така да започнете со искрено зборување со детето дека не сте пораснале во дом каде што се зборувало за чувствата, но дека знаете дека е важно и дека сакате да го промените тоа. Искреноста е важен чекор во градењето доверба.
- Дајте пример, не испрашувајте
Кога ќе го прашате вашето дете како му поминал денот, веројатно ќе добиете одговор од еден збор. Обидете се со нешто различно – наместо прво да го замолите вашето дете да се отвори, споделете нешто за вашиот ден: „Денес беше навистина зафатен за мене. Бев возбудена утрово, но потоа се случи нешто неочекувано што ме фрустрираше. Излегов на прошетка и тоа ми помогна да се чувствувам подобро. Сега сум среќна што сум со тебе и што можам да слушнам како го помина денот“, вели терапевтот Мора.
- Искрениот разговор нека биде дел од рутината
Едноставен, но моќен начин да се одржи комуникацијата е да се направи дел од семејната рутина. Мора истакнува дека во нејзиниот дом секоја вечер имаат разговор од висок до низок, во кој секој од нив го споделува најважниот момент од денот, нешто што било тешко и еден позитивен момент.
- Научете стратегии за справување со предизвиците
Кога зборувате за чувствата, исто така отворате врата за разговор за вештини за справување што можат да ви помогнат да се справите со нив. На пример, откако ќе ја именувате вашата фрустрација на глас, можете да додадете: „Кога се чувствувам така, се обидувам да дишам длабоко за да му помогнам на моето тело да се смири“.
Можете дури и да вежбате неколку смирувачки вдишувања заедно пред спиење. Тоа е едноставен, моќен начин да покажете дека регулирањето на емоциите е нормално и изводливо.
Довербата се гради во мали моменти
Децата секогаш гледаат. Тие не само што слушаат што кажувате – тие забележуваат како го кажувате тоа, кога го кажувате и што избегнувате.
Ако сакате вашето дете да ви верува со големи работи, покажете му дека може да ви верува и со мали работи. Прифатете ги и потврдете ги неговите чувства и покажете дека она што му е на ум е важно. Бидете искрени, нормализирајте ги емоциите и создадете простор за искрени разговори – дури и кога се тешки.
