Научниците се загрижени поради можноста анксиозноста настаната поради пандемијата со коронавирусот, да ги наведе луѓето да создадат компулсивни хигиенски навики што би можеле да ги спречат во повторна интеграција во надворешниот свет, и покрај намалениот број на хоспитализации и смртни случаи предизвикани од болеста КОВИД-19.
Концептот “синдром на ковид анксиозност“ први го теоритизираа д-р Ана Никчевиќ од Универзитетот Кингстон и Маркантонио Спада од Универзитетот Саут банк во Лондон, кога забележале дека луѓето развиваат одредена низа на особености како одговор на пандемијата. Тие особености вклучуваат присилна проверка на присутност на симптоми на инфекција, избегнување јавни места и опсесивно чистење.
Но, сега сметаат дека појавите како избегнување било какви закани, страв од користење јавен превоз или повеќечасовно чистење на домот, нема лесно да се смират дури ниту кога КОВИД-19 ќе биде под контрола.
“Стравот е нормален. И вие и јас би требало да се плашиме од вирусот, оти е опасен. Меѓутоа, разликата во поглед на развивањето психопатолошки одговор е во тоа дали се однесувате со претерано безбедни начини кои ве заклучуваат во страв. Очекувам да имаме луѓе кои ќе избегнуваат повторно социјално ангажирање и кои постојано се грижат поради вирусот во месеците кои доаѓаат, без оглед далли се вакцинирани или не“, смета Маркантонио Спада.
