Бабите ги обожаваат своите внуци и сè што прават е од најдобра намера. Но, некои од нивните „воспитни правила“ се базираат на традиции и лични уверувања, а не на медицински факти. Познатиот педијатар д-р Евгениј Комаровски објаснува зошто некои од овие добронамерни совети – не држат вода.
- Детето треба да јаде супа секој ден
Бабите веруваат дека супата е незаменлива за варењето и здравјето, па инсистираат секој ден да има „нешто на лажица“.
Според д-р Комаровски, не е штетно, но не е ни неопходно. „Тоа е прашање на вкус и семејни навики. Од медицински аспект – не е потребно топло, течно јадење секој ден“, вели тој.
- Лукот ги лечи настинките и вирусите
Некои баби дури ставаат ченови лук во детската соба, верувајќи дека ќе ги избркаат вирусите.
Лекарот вели дека тоа не помага. „Лукот не ги штити децата од вируси. Напротив, силниот мирис може да го зголеми секретот и да предизвика кашлица или бронхоспазми кај некои деца.“
- Читањето во темница го расипува видот
Класично бабино предупредување: „Не читај во темница, ќе ослепиш!“
„Да, очите се заморуваат побрзо, но тоа не го влошува видот“, вели д-р Комаровски. „Луѓето со векови читале на свеќа, па не ослепеле.“
- Кога ќе наполни една година, детето треба да се шиша до кожа
Се верувало дека така ќе израсне погуста и поцврста коса.
„Тоа е само мит“, вели докторот. „Шишањето не влијае на густината или квалитетот на косата. Тоа е повеќе бајка отколку факт.“
- Не е добро детето долго да седи на нокшир
Некои баби велат дека од долго седење може да дојде до „испад“ на ректумот.
„Ако детето нема вродени аномалии, може да седи на нокшир со часови – без никаков проблем“, објаснува д-р Комаровски. „Ако долго седи, можеби му е само пријатно или си игра. Но, ако има проблем со празнење – треба лекар.“
- Детето мора добро да јаде
Од страв дека внукот ќе биде гладен, бабите често го нудат со „само уште едно залче“.
Принудното јадење е штетно, вели докторот. „Така децата го губат природното чувство за глад и ситост, што може да доведе до прејадување и проблеми подоцна.“
- Детето мора да е во кревет до 21 часот
Бабите строго внимаваат на распоредот за спиење.
Додека редовниот сон е важен, д-р Комаровски вели дека не треба слепо да се држиме до саатницата. „Ако детето се буди на време, одморено и весело – не е страшно ако легнало малку подоцна.“
