Децата родени за време на Ковид пандемијата може да имаат понизок коефициент на интелигенција заради намалената интеракција за време на заклучувањата, се тврди во една студија.
Истражувачите од Универзитетот Браун во Род Ајленд откриле дека бебињата родени од март 2020 година имаат полоши когнитивни, вербални и моторни вештини од децата што дошле на свет пред коронавирусот.
Дали падот во развојот ќе влијае на децата во подоцнежниот живот или не, не е сигурно, велат истражувачите
Просечниот коефициент на интелигенција за деца на возраст од три месеци до три години паднал од околу 100, колку што бил во деценијата пред пандемијата, на 79 за време на истата. За време на карантините децата имаа значително помала интеракција со надворешниот свет, што доведе до „шокантно“ низок когнитивен развој.
Дали падот во развојот ќе влијае на децата во подоцнежниот живот или не, не е сигурно, велат истражувачите. Мозокот на бебињата е поподатлив отколку на возрасните и најверојатно тие ќе можат да се опорават.
Педијатарот д-р Шон Деони, главен автор на студијата, вели дека намалувањето во резултатите од коефициентот на интелигенција е значајно. Тој изјави за „Гардијан“: „Тоа не е ни малку суптилно. Типично не гледате такви работи, надвор од големите когнитивни нарушувања“.
Научниците ги тестирале децата на вербални, невербални и вештини за рано учење за да го проценат нивниот развој. Д-р Деони вели: „Родителите се под стрес и изнервирани. Интеракцијата што детето нормално би ја добило е значително намалена.“
Тој вели дека додека падот на коефициентот на интелигенција на рана возраст не гарантира дека децата ќе бидат помалку интелигентни во подоцнежниот живот, „способноста за поправање на курсот станува помала, колку што е постаро детето“.
- Главниот фактор зад намалувањето на перформансите на тестовите беше стресот на родителите додека работеа од дома, велат авторите
Тие додаваат дека носењето маска од возрасните може исто така да има влијание и врз развојот на бебињата, бидејќи децата биле помалку способни да учат од знаците на лицето, пишува „Дејли мејл“.
