Без разлика дали ќе ползи или не, вашето бебе со осум месеци сигурно повеќе ќе се движи. Овозможете му безбедна околина за тоа.
Што сега прави?
Со осум месеци, бебето можеби ќе ползи, иако има бебиња кои со оваа активност ќе почнат подоцна, и ќе станува се порадознало и сите работи темелно ќе ги истражува – со удирање или фрлање на под. Ќе може да се врати на она што го правело, ако го прекинете во нешто и ќе знае да се снајде со неколку работи одеднаш.
Во овој период бебето можеби ќе одбива да ве послуша ако нешто одлучно сте му кажале, тестирајќи ги така вашите граници. Мора да останете одлучни и истрајни.
На оваа возраст може да се појави и првиот заб, па ако бебето е раздразливо и многу се лигави, тоа може да биде причината.
Како комуницира?
Бебето се уште е недоверливо кон нови личности и нема да ги поздравува среќно како претходно. Ќе биде многу поврзано со вас и јасно ќе ви дава до знаење дека сака да биде само со вас.
Како може да му помогнете?
Сега, кога е поподвижно, може и повеќе да играте со бебето. Кога ќе му се обраќате, правете го тоа јасно и изговарајте одредени зборови така да може да учи од вас. Не заборавајте ги многуте прегратки за да се чувствува заштитено. Ако забележите дека на бебето почнуваат да му растат заби, понудете му оладени играчки за гризање или тврди предмети кои се безбедни.
