Кардиотокографијата, односно ЦТГ-то го проверува бројот на отчукувања на срцето на вашето бебе и дали бебето добива доволно кислород од плацентата. Воедно се следи и зачестеноста на трудовите или породилни болки. ЦТГ обично се прави во последниот триместар од бременоста, прегледот е едноставен, целосно безболен и безопасен за вашето дете и за вас.
Зошто се спроведува?
Се спроведува во подоцнежните фази од бременоста. Често се користи во случаи кога мајката го поминала терминот за породување за да се утврди дали се е во ред со фетусот. Во некои случаи, ова тестирање се прави како мерка на претпазливост по проблеми во претходна бременост или поради високи ризик фактори, како што се дијабетес, нарушувања на интраутериниот раст и слично.
Како се спроведува?
Во лекарската ординација ќе легнете или ќе седнете, а докторот ќе ви прикачи опрема за снимање. Мониторот ќе го снима пулсот на бебето заедно со секоја интраутерина активност. Тоа трае околу 20 минути.
Кога се прави?
Најчесто се изведува помеѓу 38 и 42 недела, но може да се направи во секое време во третиот триместар.
Што се следи?
Најчесто се гледа дали бебето реагира или не. Срцевиот ритам на вашето бебе треба да биде во опсег од 120-160 во минута. Ако отчукувањата на срцето се зголемуваат по движење на бебето, тоа е добар знак. Но, понекогаш бебињата не соработуваат за време на прегледот и одбиваат да се придвижат. Во овој случај, мајката ќе се напие нешто слатко за да го разбуди бебето. Ако тоа не функционира, понекогаш се користи кратка прошетка за да се разбуди бебето. Имено, поради недостаток на простор, бебињата често спијат во стомакот!
Што ако бебето сè уште не реагира?
Ако бебето не реагира, лекарот ќе донесе одлука за дополнителни тестови што можете да ги направите или за можно индуцирано породување.
