Иако повеќето од виталните органи на бебето се веќе присутни, тие се уште не ја извршуваат својата конечна функција.
Срцето на бебето чука двојно побрзо од срцето кај возрасно лице, околу 140-150 пати во минута. Очите, ушите и устата кои бебето може да ги отвори, се веќе формирани. Рацете и нозете веќе се доволно долги да бебето може да ги помрднува, што и е видливо на ултразвук. Бебето е долго околу 3 сантиметри и тежи околу 3 грама.
Ако досега не сте посетиле гинеколог, сега е време тоа да го направите.
Најдобро е прегледите да ги правите еднаш месечно до 28. недела од бременоста, а потоа прегледите се планираат на секои три недели. Од 36. недела, пак на секои две недели. За време на терминот за породување, прегледите се прават еднаш неделно или почесто.
При првиот гинеколошки преглед, вашиот гинеколог ќе ве испраша за здравјето и за болестите во семејството. Пред да отидете на лекар, сетете се на датумот на последната менструација, бидејќи лекарот сигурно ќе ве праша за тоа.
Прашајте го својот матичен гинеколог се што не ви е јасно во врска со бременоста. Однапред направете листа на прашања за се што ве интересира.
