Се нарекуваат утрински, но мачнините во бременоста и не мора да се јават само наутро, туку бремените жени може да ги имаат во било кој период од денот. За многу жени, токму мачнините се првиот симптом за бременост, а обично се јавуваат пред 9. недела од бременоста. Кај поголемиот број трудници, состојбата се повлекува до второто тромесечје, но не е исклучено да трае и подолго.
Утринските мачнини може да бидат благи – мачнина која трае кратково текот на денот и ретко доаѓа до повраќање, или посилни – трае по неколку часа дневно и трудниците повраќаат повеќе од два пати во денот.
Заедно со мачнините, кај трудницата може да се јави и интолеранција на одредена храна, напитоци или мириси.
Мачнината и повраќањето обично не се штетни по фетусот, а некои истражувања дури и покажуваат дека колку е посилна утринската мачнина, толку е помал ризикот од спонтан абортус. Исто така, постојат некои податоци кои укажуваат дека трудниците кои носат женско дете почесто имаат мачниниод оние кои носат машко дете.
По прашање на мачнините, нема многу што може да се направи, но од помош ќе биде ако наутро по станување консумирате сув тост, двопек или крекери, ако внесувате доволно течности и јадете почесто, но помали оброци кои не се масни. И чајот од ѓумбир може да ги смири овие мачнини.
