Овчите сипаници се најчестото регистрирано акутно заразно заболување во декември во земјава, со вкупно 1.025 пријавени лица, покажуваат податоците на Одделот за епидемиологија на заразни заболувања при Институт за јавно здравје на РСМ, објавени на нивната веб-страница.
„Во вкупниот број на заболени во месецот учествуваат со 63,2 %, а во групата на 10 најчести заразни заболувања со 63,9 %. Во однос на претходниот месец ноември 2024 година (n=395) се регистрира зголемување на бројот на зaболени од овчи сипаници за повеќе од 2,5 пати“, се вели во Билтенот за движењето на акутните заразни заболувања во РСМ во месец декември, 2024 година.
Што е варичела?
Варичелата, позната како овчи сипаници, е акутна вирусна болест предизвикана од варичела-зостер вирусот. Болеста започнува ненадејно, со покачена температура и појава на карактеристичен осип. Станува збор за исклучително заразно заболување, особено во раните фази. Иако може да се појави во кој било период од годината, варичелата е почеста во зимските месеци.
Кај децата болеста обично поминува со благ до умерен тек и симптоми како треска, замор, и чешање.
Како изгледа осипот?
Осипот при варичела се развива постепено и брановидно. Промените започнуваат како рамни, црвени дамки (макулопапуларен осип), кои потоа преминуваат во везикули – меури исполнети со бистра, а подоцна заматена течност. На крај, везикулите пукаат и се претвораат во суви кори (красти).
Во повеќето случаи, овчите сипаници поминуваат без проблеми, но треба да се внимава кај ризичните групи или при појава на симптоми на компликации
Најчесто, осипот е локализиран на покриените делови од телото, а може да се јави и на скалпот, високо под пазувите, на слузниците на устата, горниот дел од респираторниот тракт и на конјунктивите (внатрешната страна на очните капаци). Бројот на лезии обично се движи од 250 до 500, ретко се јавуваат случаи со многу мал број промени.
Како се пренесува варичелата?
Вирусот се шири преку:
- Капки во воздухот (при кивање и кашлање);
- Директен контакт со пациентот или со содржината на неговите везикули;
- Контакт со везикули кај пациенти со херпес зостер (компликација од инфекцијата со VZV);
- Индиректно преку контаминирани предмети.
- Треба да се напомене дека крастите (последната фаза на осипот) не се заразни.
Варичелата е една од најчестите заразни болести кај децата на возраст од 1 до 7 години. Иако тие можат да се појават на која било возраст
Важно е лицето со варичела да избегнува контакт со други луѓе, особено со:
- Бремени жени: Инфекцијата може да предизвика компликации за мајката и бебето.
- Новороденчиња: Варичелата може да биде потешка кај бебиња кои се заразиле непосредно по раѓањето.
- Лица со ослабен имунитет: Како луѓе со рак, ХИВ/СИДА или кои примаат имуносупресивна терапија.
Инкубација и заразен период
Инкубацискиот период, односно времето од изложеност до појава на симптоми, трае од 2 до 3 недели (најчесто 13–17 дена). Лицето е заразно од 1-2 дена пред да се појават пликовите, па сè додека сите пликови не се исушат и не станат красти (обично 5-7 дена).
Превентивни мерки
- Одржување на добра лична хигиена;
- Применување на бонтон при кашлање и кивање;
- Избегнување контакт со заразени лица;
- Дезинфекција на контаминирани предмети;
- Социјално дистанцирање.
Прочитајте и…
