Некои деца на возраст помеѓу две и четири години, како и децата кои одат во градинка, едноставно не можат да спијат подолго од пет или шест часот наутро. Кога ќе се разбудат, речиси никогаш не се заинтересирани за тивка игра во кревет, туку се подготвени да го освојат светот. Секојдневното будење во зори ги исцрпува родителите и се прашуваат дали постои начин детето да остане барем еден час подолго во кревет.
Поминувајте доволно време на отворено
Секое дете има потреба од своја дневна доза престој на отворено, да игра и да трча во природа. На малите ранобудници им е потребен дури и повеќе од другите деца. Оставете го детето да се измори во текот на денот, но најмалку два часа пред спиење, не се впуштајте во интензивни активности и намалете ги дразбите за детето да се опушти и да се подготви за спиење.
Одложете го вечерното легнување во кревет
Прерано легнување може да биде причина за прерано будење, тврдат експертите. Секоја вечер обидете се да го одложите одењето на спиење за десет минути, но внимавајте уморното дете дополнително да не го исцрпите, бидејќи преуморните деца не спијат добро.
Затемнете ја собата
Некои деца се прилично чувствителни на утринската светлина, затоа погрижете се просторијата да биде целосно затемнета пред зори. Ако во близина на вашата соба постои можност за надворешен шум, затворете ги сите прозорци и врати за детето да не се разбуди.
Ставете играчки и сликовници во близина на детето
Ставете една или две меки играчки или сликовници во близина на креветот на детето за да може самостојно да се забавува кога ќе се разбуди наутро. Секако, во овој случај просторијата не смее да се затемнува за да може детето да гледа со што си игра. Некои деца го сакаат исклучиво вниманието на родителите кога ќе се разбудат, а некои ќе ги забавуваат играчките, па ќе добиете малку повеќе време за спиење.
Укинете го ноќното пиење
Прекумерно количество течност пред спиење или шише со вода во кревет што му е достапно на детето цела ноќ може да предизвика зголемено мокрење, а мократа пелена го иритира детето и може да биде причина за прерано будење. Укинете го ноќното пиење и намалете го консумирањето на течности на вашето дете пред спиење.
Поместете го појадокот
Ако детето е навикнато да јаде веднаш по будењето, со текот на времето желудникот се навикнува да се буди рано за да добие храна. Обидете се, секое утро, да го поместите времето за појадок за десет минути додека не дојдете до времето што ви одговара вам.
