Повеќето родители сакаат нивните деца да бидат способни да се справат со најголемите животни предизвици. Тие можат да ја постигнат оваа цел така што ќе ги научат како да бидат ментално силни, велат психолозите. Луѓето со ментална цврстина покажуваат голем број особини и квалитети поради кои е поверојатно да бидат среќни, успешни луѓе, вклучувајќи самодоверба, упорност и издржливост.
И децата и возрасните можат да развијат и усовршуваат ментална сила со текот на времето, велат експертите. Тие издвојуваат четири работи што родителите можат да ги направат за да воспитаат ментално силни деца.
1. Помогнете им да се зајакнат себеси
Довербата и самомотивацијата се важни аспекти на менталната цврстина, што значи дека децата не треба да зависат од други луѓе за да се чувствуваат добро, потенцира психотерапевтот Ејми Морин.
„Можете да помогнете во зајакнувањето на децата со тоа што ќе ги научите фрази што ги потсетуваат дека тие се одговорни за тоа како размислуваат, чувствуваат и се однесуваат“, вели Морин.
Фразите треба да бидат кратки и лесни за паметење. На пример:
- Сè што можам да направам е да дадам се од себе“.
- „Јас сум доволно добар/а“.
- „Денес избирам да бидам среќен/а“.
2. Покажете им колку е важно да се направи нешто тешко
Може да биде тешко да се гледаат децата како не успеваат во нешто. Сепак, родителите треба да им покажат на своите деца дека прифаќањето на тежок предизвик може многу да ги научи, на пример, како да се однесуваат под притисок, без разлика дали ќе успеат или не успеат.
Важно е да се пофалат децата кога покажуваат храброст да прифатат тежок предизвик, вели психологот Мери Ц. Марфи. „Помогнете им да размислуваат за она што го научиле и како можат да ги применат тие нови лекции и вештини во иднина“,
Таа советува да се обидеме на децата да им раскажуваме лични приказни за времињата кога сме издржале во тешки ситуации и што сме научиле од грешките од минатото.
3. Останете оптимисти
Нашиот став може да биде заразен, па затоа детските психолози велат дека е важно родителите да моделираат добро однесување за своите деца. Ова го вклучува оптимизмот, кој е клучна компонента на менталната сила, цени неврологот Венди Сузуки.
Оптимистичните деца полни со надеж чувствуваат поголема контрола врз сопствените животи и имаат тенденција да имаат поголема самодоверба кога преземаат нови предизвици, објаснува образовниот психолог Мишел Борба. Оптимизмот може да се научи и подучи, па затоа е важно да се запамети дека децата секогаш слушаат и бараат знаци за однесување, додава таа.
„Следниот пат кога ќе се случи нешто, можете да кажете: „Во ред е, можеме да го направиме ова“. Ако постојано го кажувате ова, вашите деца всушност ја слушаат вашата стратегија и веројатно е дека самите ќе ја применат“, истакнува Борба.
4. Научете ги како и кога да се извинат
Клучен аспект на менталната сила е емоционалната интелигенција, која вклучува емпатија и самосвест. Родителите треба да ги учат децата на важноста да ги почитуваат другите и себеси, вклучително и почитување на туѓите гледишта и искрено извинување кога направиле грешка, вели Морин.
Сепак, тоа не значи дека ние или нашите деца треба постојано да се извинуваме, бидејќи тоа може негативно да влијае на самодовербата, заклучува психотерапевтот.
